Sapar barysynda qujat joǵaltý – saıahatshylar úshin eń jaǵymsyz jaǵdaılardyń biri. Tipti eń abaı saıahatshylar da ózderiniń jeke kýáligi nemese tólqujatyn tosyn jerde joǵaltýy múmkin. Mundaı jaǵdaıda ne isteý kerek?
İshki reıster
Astana áýejaıynyń baspasóz qyzmeti ishki reısterde sheshim bar ekenin aıtty.
"Saıahatshy eGov mobile qosymshasy arqyly sıfrlyq jeke kýálikti paıdalana alady. Bul málimetter resmı túrde moıyndalady jáne áýekompanıalar tirkeý men ushýǵa otyrǵyzý kezinde qabyldaıdy", – delingen habarlamada.
Iaǵnı, eger qujat joǵalsa da, telefondaǵy sıfrlyq qujat el ishinde ushýǵa kedergi bolmaıdy.
Halyqaralyq reıster
Shetelge saparǵa shyǵaıyn dep jatqanda joǵaltsańyz, jaǵdaı kúrdelirek bolady. Kóp baǵytta shetel tólqujaty – shekarany kesip ótýge múmkindik beretin jalǵyz qujat.
"Keı jaǵdaılarda jaramdy vıza da qajet. Tólqujaty bolmasa, saıahatshy reıske jiberilmeıdi, sebebi memlekettik shekarany kesip ótý múmkin emes. Sonymen qatar, taǵaıyndalǵan el de pasporty men vızasy joq adamdy qabyldamaıdy", – dep túsindirdi Astana áýejaıynyń ókilderi.
Reseı men Qyrǵyzstanǵa ushý kezinde qazaqstandyqtar jeke kýálikti paıdalana alady. Jaqynda Armenıaǵa ushý úshin de osyndaı múmkindik paıda boldy. Degenmen, kez kelgen jaǵdaıda Lost&Found bólimine habarlap, áýekompanıaǵa málimdeý mańyzdy.
Qujat shetelde joǵalǵan jaǵdaıda
Eger pasport Qazaqstannan tys jerde joǵalǵan bolsa:
-
Qazaqstannyń eń jaqyn konsýldyǵyna nemese elshiligine júginý.
-
Joǵaltý týraly habarlap, qaıtarý kýáligin rásimdeý. Bul qujat Qazaqstanǵa kirýge jáne turǵylyqty jerge jetýge múmkindik beredi.
"Pasport shetelde joǵalǵan jaǵdaıda azamattar Qazaqstan Respýblıkasynyń konsýldyq mekemesine júginedi, onda olar qaıtarý kýáligin alady, ol RK aýmaǵyna kirýge jáne turǵylyqty jerge jetýge jaramdy. Qazaqstanǵa kelgen soń qujatty qalpyna keltirý úshin ýákiletti organdarǵa júginý qajet", – dep atap ótti Syrtqy ister mınıstrliginiń baspasóz qyzmeti.
Tájirıbeli saıahatshylar joǵalǵanyn jergilikti polısıada tirkeýdi de keńes etedi. Sáıkestendirý týraly anyqtama jańa qujattar rásimdeýde qajet bolýy múmkin.
Saıahatshylarǵa keńester
Astana áýejaıynyń ókilderi sapar barysynda barlyq qajet qujattyń bar-joǵyn aldyn ala tekserip, olardy senimdi orynda saqtaý mańyzdy ekenin eskertedi.
Tájirıbeli saıahatshylar da birneshe keńes beredi:
-
Qujattardy aqsha men tehnıkadan bólek saqtaý;
-
Pasporttyń kóshirmesin jáne fotosýretterin jasaý;
-
Maqsatty eldegi Qazaqstan konsýldyq mekemeleriniń mekenjaıy men baılanys derekterin aldyn ala bilý.