Alatau Aqparat medıaholdıngine qarasty «Almaty aqshamy» gazetiniń fototilshisi Samat Qusaıynovtyń Ankarada fotokórmesi ótti, dep habarlaıdy aqshamnews.kz
«Uly dalanyń salt-dástúri» – Türk Yurtlarında Büyük Bozkırın Kültürü» atty fotokórmeni Alatau Aqparat medıaholdıngi men TÚRKSOI halyqaralyq túrki mádenıeti uıymy birlesip uıymdastyrdy.
Kórmege TÚRKSOI Bas hatshysy Sultan Raev, «TÜRKTAV» Túrki tarıhy mádenı qorynyń atqarýshy dırektory Ásel Lahaeva, Anadoly mádenıetteri mýzeıiniń dırektory Iýsýf Kyrach jáne basqa da qonaqtar qatysty. Áriptesimiz, belgili fotomaman Samat Qusaıynovqa TÚRKSOI Bas hatshysy Sultan Raevtyń Alǵys hatyn kómekshisi Melık Ózsóz tabystady.
«Uly dala mádenıeti» kórmesi – Qazaq dalasynyń tarıhy, mádenıeti jáne ómir saltyn tanystyrý maqsatyndaǵy erekshe is-shara. Kórme Qazaqstannyń keń baıtaq geografıasyn, onyń tarıhı jáne mádenı murasyn, dala turǵyndarynyń tabıǵatpen úılesimdi ómirin beıneleıdi.
«Uly dala mádenıeti» kórmesinde Samat Serikbaıuly Qazaqstannyń ár aımaǵyndaǵy adamdardyń kúndelikti ómirin beınelep, olardyń qonaqjaılylyǵyn, dástúrlerin jáne tabıǵatpen baılanysyn kórermenge áserli jetkizdi. Onyń shyǵarmalary ulttyq mádenı mura retinde baǵalanyp, fotojýrnalıstıka salasyndaǵy jetistikterimen halyq arasynda tanymal.
Kórmeniń basty maqsaty – Qazaqstannyń mádenı murasyn tanytyp, Uly Dalanyń baı tarıhyn kórkem tilmen baıandaý.
– Meniń maqsatym – qazaq mádenıetin, ulttyq oıyndardy, ádet-ǵurypty sýret óneri arqyly dáripteý. Túrik, ázirbaıjan, tájik – bárin ustap uıytyp turǵan ol – ulttyq salt-dástúr. Biz Anadolyda, jalpy shet memleketterde qazaqtyń da rýhanı dúnıesi baı ekendigin dáleldeı túskimiz keledi.
Bizdiń kórme Túrkıanyń «Anadoly órkenıetteri murajaıynda» uıymdastyryldy. Murajaı negizi – 1921 jyly qalanǵan. Mýzeı Túrkıanyń tuńǵysh prezıdenti Mustafa Kemal Atatúriktiń basshylyǵymen keńeıip, ǵımaraty jańarǵan. Búginde murajaıda neolıt, qola dáýiri, Assırıa men Ýrartý, hetıtter men frıgıalar, Ejelgi Gresıa men Ejelgi Rım, Vızantıa jáne Osman ımperıasy órkenıetterinen jınaqtalǵan koleksıalar saqtalǵan. Tipti, tarıhy 7500 jylǵa baratyn jádigerler bar. Bul aýmaq «Uly Jibek jolynyń» uıytqysy bolǵan. Osyǵan qarap týǵan ólkem Taraz ben Anadoly arasynda da mádenı sabaqtastyq bolǵanyn sezemin.
Túrki fototilshilerinen asa aıyrmashylyq bar dep aıta almaımyz. Áıtse de, túrik aǵaıyndarda 1984 jyly «Túrik foto odaǵy» qurylypty. Bıyl 40 jyldyq mereıtoıy eken. Biz de sonda qonaq boldyq, pikir hám tájirıbe almasyp qaıttyq. Ózderiniń irgeli jýrnaly shyǵatyn kórinedi. Ártúrli tematıkaǵa baılanysty atymtaı azamattardyń qoldaýynyń arqasynda fotoónerdi dáriptep otyrady.
Anadoly mýzeıinde fotoónerimdi kórsetý – zor qýanysh ári qubylys! Túrki memleketteriniń yntymaqtastyq kúnine oraı TÚRKSOI jáne «Alatau Aqparat» medıaholdıngtiń bastamasy ári qoldaýymen Ankara tórinde jeke fotosýret kórmem ashylyp jatyr. Men úshin bul úlken mártebe, qýanysh. Sýretterimde túrki elderdiń ortaq qundylyqtaryn, salt-dástúrlerin kórsetkim keldi, - deıdi Samat Serikbaıuly
Aıta keteıik, áıgili fototilshi Samattyń shyǵarmashylyq keshi týǵan jeri kóne Taraz jerinen bastaý alyp, baýyrlas tili, dili, dini bir túbirles Túrkıa elinde jalǵasyn tapty.
El arasynda «Elýde – el aǵasy» degen ataly sóz bar. Rasynda, osy ulaǵatty oıdyń astarynda talaı maǵyna jatyr. Atajurttan Anadolyǵa baryp, qazaqtyń ulttyq qundylyqtaryn fotoónerimen tanytyp júrgen aqjarqyn júzdi arda azamat Samat Serikbaıulyna alar asýyń alda bolsyn dep áriptester bolyp tilek bildiremiz!