Almaty oblysynda 14 jasynda 22 avtokólíktíń ıesí atanǵan jasóspírím tūrady. Būl - eshqandaı da ańyz emes, auyldan shyqqan alǵyr balanyń jetístígí. 6 jasynan atqa qonyp, báıge óneríníń qyr-syryn meńgergen Abzal Tūrǵanbek búgínde respublıkalyq deńgeıdegí talaı dodada top jaryp júr. Aqshamnews.kz tílshísí jas shabandozben tíldesíp, onyń jeńíske toly joly, komanda eńbegí jáne bolashaq armany turaly sūrap bíldí.
"Jylqyǵa ákem úırettí": alty jasynan atqa qonǵan Abzal
Abzal Tūrǵanbek - Almaty oblysy, Jambyl audany, Aqterek auylynyń tumasy. Qazír ol tuǵan auylyndaǵy orta mektepte 9-synypta oqıdy. Búgínde ol bas-ayaǵy 500 báıgege qatysqan. Sonyń íshínde "Jetísu júırígí", "Elorda kubogy", Kemel Toqaevtyń 100 jyldyǵyna arnalǵan báıge, Qazaqstan chempıonatynyń Olympbet top báıge fınaly, Abaı Qūnanbaıūlynyń 180 jyldyǵyna arnalǵan alaman báıgelerdíń jeńímpazy atandy.
"Mení jylqyǵa mínuge ákem úırettí. Al báıgení kásíbı deńgeıde túsíndíríp, úlken jarystarǵa alyp shyqqan bapkerím - Mūrat Aryqbaev. Auylda taıǵa míníp, shaǵyn báıgelerde shauyp júrgen kezímde Mūrat aǵa baıqap, úlken dodaǵa daıyndap, shyńdaǵan bolatyn", - deıdí ol.
22 avtokólík qazír qaıda? Jeńís artyndaǵy komanda eńbegí
Abzal qazírge deıíngí dodalardan 22 avtokólík jeńíp aldy. Bíraq ol būl jetístíkterdí jalǵyz ózíníń úlesí dep sanamaıtynyn aıtty.
"Báıge – bír adamnyń emes, bútín bír júıelí komandanyń jūmysy. Ár nátıjeníń artynda bapkerdíń, atqosshylardyń úlesí bolady. Óıtkení ol jarystarǵa daıyndap, atty qysqa da, ūzyn qashyqtyqqa da baptaıdy. Al atqosshylar tūlpardyń jem-shóbín beríp, kútímín jasap, astyn tazalap, kúıín baqylap otyrady, bapkerdíń tapsyrmasyn būljytpaı oryndaıdy. Olardyń da eńbegí orasan zor", – deıdí shabandoz.
Ol jeńíp alǵan kólíkterdíń bír bólígí satylǵanyn, al keıbírín báıgege qosylǵan tūlpardyń ıelerí alyp qalatynyn aıtty.
Eń qymbat júlde men eń qyzyq estelík
Abzal ūtqan kólíkterdíń íshíndegí eń qymbaty 23 mln teńge tūrady. Al eń qyzyq estelík qaldyrǵany – 2023 jyly Syr óńírínde ótken Myhan Ernıyazūlynyń 130 jyldyǵyna arnalǵan qūnan báıgedegí bas júlde. Sol jarysta ol Hyundai i30 kólígín jeńíp alǵan.
Eń qyzyq sáttí de Abzal dál osy báıgemen baılanystyrady. Būl báıgede ol ózíníń ūtymdy ádísíníń arqasynda oza shapqanyn jetkízdí:
"12 shaqyrymdyq básekege 46 qūnan shyǵyp, jarys 6 aınalymǵa sozyldy. Men alǵashqy tórt aınalymda qūnanymdy "ashytpaı", aldyǵa bírden ūmsynbaı, qarqynyn saqtap otyrdym. Al sońǵy ekí aınalymda taktıkany ózgertíp, topqa jetíp, sońǵy 500 metrde qūnandy bar kúshíne saldym. Nátıjesínde bas júlde būıyrdy", - deıdí Abzal.
Abzaldyń aq adal armany ne?
Shabandozdyń kún tártíbí mausymǵa qaraı ózgeredí. Jazda ol tūlpar daıyndaıtyn jerge ketíp, tańǵy 5–6-da atqa qonady. Sebebí tańǵy salqyn – árí shabandozǵa, árí tūlparǵa qolaıly uaqyt.
«Attardyń kúnge kúıíp, júní sarǵaıyp ketpeuí úshín erterek mínemíz. Daıyndyq úzdíksíz júredí: qys, kóktem, jaz boıy at mínu toqtamaıdy. Ystyq-suyqqa qaramaı suytu, «ashchy terín alu», qalypqa túsíru – kúndelíktí jūmys. Qaı báıgede qaı atqa shabatynymdy bapker sheshedí: "báıgege jaqyn qalǵanda sen osy atqa shabasyń" dep naqty bekítedí", - deıdí Abzal daıyndyǵy jaıly.
Jas shabandozdyń tíregí – otbasy, bapkerí, bauyrlary men synyptastary. Onyń aǵasy, ápkesí jáne 5 qaryndasy bar. Al Abzaldyń endígí eń úlken maqsaty – salmaǵy artqan soń klassıkalyq at shabysyna auysyp, kásíbı deńgeıde halyqaralyq arenalarda shauyp kóru.
"Frantsıya, Germanıya, Dubaıda klassıkalyq at shabysqa shapqym keledí. Sol jaqta júríp at sportynyń damuyna úles qosyp, bıík belesterdí baǵyndyrǵym keledí", – deıdí ol.
Abzaldyń súıíktí jylqysy - Lazer
Jas sportshynyń óz qatarlastaryna aıtatyn keńesí de mol. Ol jasóspírímderge bos uaqytty áleumettík jelíge jūmsamaı, atqa míníp, báıgege, kókparǵa baryp, jígíttík mínez qalyptastyruǵa keńes beredí.