Qazaqstan Respýblıkasy Kólik mınıstrliginiń Azamattyq avıasıa komıtetiniń tóraǵasy Saltanat Tompıeva Halyqaralyq azamattyq avıasıa uıymynyń (IKAO) Bas hatshysy Hýan Karlos Salazardyń sheshimimen IKAO-nyń Ǵalamdyq elshiler baǵdarlamasy aıasynda elshi bolyp taǵaıyndaldy, - dep habarlaıdy Aqshamnews.kz.
Bul taǵaıyndaý IKAO tarapynan Qazaqstan Respýblıkasyna kórsetilgen joǵary senimdi bildiredi ári eldiń halyqaralyq azamattyq avıasıa kún tártibin ilgeriletýge qosqan úlesiniń moıyndalýy bolyp tabylady.
Qazaqstan ókili IKAO-nyń 56 memleketti biriktiretin Eýropalyq jáne Soltústik Atlantıkalyq óńirlik búrosy (EUR/NAT) sheńberinde irikteldi. Qazaqstannyń tańdalýy eldiń IKAO-nyń 2026–2050 jyldarǵa arnalǵan Strategıalyq josparynda aıqyndalǵan basymdyqtardy iske asyrýdaǵy belsendi ári tıimdi rólin kórsetedi.
IKAO elshisi retindegi qyzmetinde Saltanat Tompıeva azamattyq avıasıany damytýdyń negizgi baǵyttary boıynsha, atap aıtqanda avıasıa salasynyń ornyqty ósýin qamtamasyz etý, bilikti avıasıa mamandaryn daıarlaý jáne tartý, sondaı-aq saladaǵy áıelder men jastardyń qatysýyn keńeıtý máseleleri boıynsha túsindirý jumystaryn arttyrýǵa úles qosatyn bolady.
Atalǵan qyzmet erikti negizde jáne Birikken Ulttar Uıymy men IKAO-nyń táýelsizdik, beıtaraptyq jáne etıka qaǵıdattaryn qatań saqtaı otyryp júzege asyrylady.
Qazaqstan Respýblıkasy Kólik mınıstrligi bul taǵaıyndaý Qazaqstannyń jahandyq azamattyq avıasıa júıesindegi belsendi rólin, sondaı-aq ornyqty damý, ınklúzıvtilik jáne adamı kapıtaldy damytý salasyndaǵy halyqaralyq bastamalarǵa berik ustanymyn rastaıtynyn atap ótedi.