Óskemen qalasynda úshínshí kún qatarynan auanyń qolaısyz meteorologıyalyq jaǵdaılarynyń ekínshí dárejesí saqtaluyna baılanysty mektep oqushylary uaqytsha qashyqtan oqytu formatyna kóshtí, - dep habarlaıdy Aqshamnews.kz.
Būl turaly qalalyq bílím basqarmasy málímdegen.
Qabyldanǵan sheshímge sáıkes, 30 qańtardan bastap bírínshí jáne ekínshí auysymda bílím alatyn oqushylar onlaın formatta oqıdy. Mūndaı shara balalardyń densaulyǵyna tónetín qauíptíń aldyn alu maqsatynda qabyldanǵan.
Mamandardyń aıtuynsha, qolaısyz aua raıy jaǵdaıynda zıyandy lastaushy zattar atmosferanyń tómengí qabatynda ūzaq uaqyt saqtalyp, qaladaǵy aua sapasynyń nasharlauyna ákeledí. Būl ásírese balalardyń tynys alu júıesíne kerí áser etuí múmkín.
Qolaısyz meteorologıyalyq jaǵdaılar kezínde eń basty basymdyq – oqushylardyń qauípsízdígí men densaulyǵy. Osyǵan baılanysty mektep oqushylaryn uaqytsha qashyqtan oqytuǵa kóshíru turaly sheshím qabyldandy, - dep málímdedí qalalyq bílím basqarmasy.
Bekítílgen oqu kestesíne sáıkes sabaqtar onlaın rejımde ótkízílíp, bílím beru úderísí tolyq kólemde jalǵasuda. Sonymen qatar ata-analardan qaladaǵy aua sapasy jaqsarǵanǵa deıín jauapty qyzmetterdíń resmı habarlamalary men mamandardyń ūsynystaryn qatań saqtau sūraldy.