Qańtar aıynyń 28–29 aralyǵynda Astanada alǵash ret uıymdastyrylǵan «Teacher’s Hackathon» respýblıkalyq pedagogıkalyq hakatony sátti aıaqtaldy, - dep habarlaıdy aqshamnews.kz.
Oqý-aǵartý mınıstrliginiń málimetinshe, is-shara elimizdiń barlyq óńirinen kelgen jas pedagogterdiń basyn qosty. Hakatonǵa 76 mamandandyrylǵan mektepten jas pedagogter qatysyp, 15 komandaǵa bóline otyryp bilim berý salasyndaǵy ózekti máselelerge baǵyttalǵan ınovasıalyq jobalaryn ázirledi.
Eki kúnge sozylǵan hakaton barysynda qatysýshylar zamanaýı pedagogıkalyq tásilder men sıfrlyq tehnologıalardy qoldana otyryp, óz ıdeıalaryn usyndy, tájirıbe almasty. Bul alań jas pedagogterdiń shyǵarmashylyq áleýetin ashýǵa jáne kásibı qaýymdastyqtaǵy ózara baılanysty nyǵaıtýǵa múmkindik berdi.
«Teacher’s Hackathon» - jas ustazdardyń kásibı quzyrettiligin arttyrýǵa, jobalyq jáne komandalyq jumys daǵdylaryn damytýǵa baǵyttalǵan mańyzdy respýblıkalyq alań retinde qalyptasyp keledi.