Referendýmda Almaty turǵyndarynyń daýys berý barysy týraly «Azamattyq bastamalar ortalyǵy» QB úkimettik emes uıymy shtabynyń basshysy Qudysheva Botagóz Qınaıatqyzy, sondaı-aq shtab músheleri – Alpysova Sáýle Muratqyzy, Tájibaev Jasulan Bákiruly aıtyp berdi.
- «Azamattyq basqarma ortalyǵy» QB men «Qoǵamdyq joba» QB referendým daıyndyǵyna óz úlesin qosty. Eki uıym birige otyryp 1500-daı táýelsiz baqylaýshy daıyndap shyǵardy. Bizdiń daıyndyqtan ótken baqylaýshylar referendýmnyń sapaly ári ashyq ótýine barynsha kómek jasaıdy dep oılaımyn, – dedi «Azamattyq bastamalar ortalyǵy» QB shtabynyń basshysy Botagóz Qudysheva.
- Almatylyqtar referendýmǵa búkil otbasymen kelip jatyr, egde jastaǵy adamdar men jastardyń da aıaq alysy jaman emes. Bizdiń baqylaýshylarymyz barynsha kásibı ári jyldam jumys istep jatyr. Barlyq quqyqbuzýshylyqtardy tirkeýge tyrysýda. Baqylaý nátıjeleriniń oń tustaryn da, teris jaqtaryn da eshkimnen jasyrmaı áleýmettik jelilerde jarıalap jatyrmyz. Qandaı da bir kúmándi jaǵdaılar boıynsha Almaty saılaý komısıasymen baılanystamyz. Jalpy sońǵy jyldary baqylaýshylardyń kásibı biliktiligi óskeni baıqalady, – dedi Sáýle Alpysova.
- Almaty saılaýshylarynyń bir ereksheligi – bizdiń qalamyzdyń turǵyndary tańerteń asqan belsendilik tanytpaıdy. Alaıda, tústen keıin adamdar belsendiligi kúrt kóbeıedi. Biz osyndaı jaǵdaıǵa kýá bolyp otyrmyz. Sońǵy 1-2 saǵattyń ózinde ortalyq aýdandarda saılaýshylar sany 10 esege artty. Sondaı-aq, qala boıynsha saılaý ýchaskisine alǵash kelgen daýys berýshige jáne 100-shi kelgen adamǵa arnaıy syılyqtar berilgenin aıta alamyz. Daýys berý barysynda qujattaryn umytyp ketken, mundaı sharaǵa alǵash ret kelgen adamdardyń barlyǵyna tıisti kómek kórsetilip jatyr – dedi Jasulan Tájibaeva.