Halyq qalap, saılaǵan ákim eldiń kóńilinen shyqpaı jatsa, jergilikti máslıhat depýttary ony ornynan alyp tastaýǵa quqyly.
Al kandıdattar aýyl basqarýǵa laıyq adam bolmasa, saılaýshylar «bárine qarsymyn» degen baǵandy tańdasa bolady, dep habarlaıdy Almaty-akshamy.kz
Táýelsiz Qazaqstannyń tarıhynda mundaı júıe buryn-sońdy bolǵan emes. Aýyl ákimderi buryn birdi-ekili óńirde ǵana saılaǵan. Tutas respýblıkany qamtyǵan saılaý bıyl birinshi ret barlyq aımaqta qatar ótip jatyr. Aýyl ákimi bolýǵa nıetti 2 myńnan asa úmitkerdiń jartysynan kóbi ózin-ózi usynǵandar. Saıasattanýshylardyń aıtýynsha, bul jaqsy úrdis.
El taǵdyryna beıjaı qaraı almaıtyn, saıasatker, saıasattanýshy, zańger azamattardyń bul turǵydaǵy pikiri qandaı eken? 24.kz saıtyna suhbat bergen olardyń kózqarastary oń sıaqty.
Rasýl Jumaly, saıasattanýshy: «Saılaý aldynda júzdegen táýelsiz baqylaýshylardy daıyndap, laýazymyn rastaýdyń da daýys berýdiń zań talaptaryna saı ótýine oń septigin tıgizeri sózsiz. Árıne, el tarıhynda alǵash ret ótip otyrǵandyqtan, atalmysh tájirıbe minsiz emes te shyǵar, dese de, mańyzy zor saıası reformalardyń sóz emes, is júzinde júrip jatqanyn joqqa shyǵarýǵa da bolmas. Buqara bıylǵy naýqandy nege asyǵa kútip otyr deısiz be? Óıtkeni álgi kandıdattardyń arasynda ózderi attaı qalap aldyrǵandary bar. Solar baq synap kórsin dep úkilep alamanǵa qosty ǵoı. Baq shaba ma, álde baby basym bola ma, ony alda kóremiz.»
Erlan Qarın, QR Prezıdentiniń kómekshisi: «Jańa normalar belsendi azamattar úshin óz áleýetin iske asyrýǵa qosymsha múmkindik berdi. Munyń bári prezıdenttik saıası reformalardyń qoǵamda úlken qyzyǵýshylyq týdyrǵanyn kórsetedi. Budan bylaı búletenderdiń ózi basqa bolady. «Bárine qarsymyn» degen baǵandy baıqaǵan bolarsyz. Sony jańadan qosyp otyr. Eger úmitkerlerdiń arasynan ákimge laıyq adam tappasańyz, qarsy ekenińizdi qadap kórsetip ketińiz».
Dýman Bazarbekov, zańger: «Osyǵan deıin zańda «bárine qarsy daýys berý» degen tarmaq múldem bolmaǵan edi. Memleket basshysynyń tapsyrmasymen saılaý júıesine osyndaı ózgeris engizilip otyr. Onyń qandaı paıdasy bar? Endi qaı partıaǵa halyqtyń qansha prosenti jaqtas ıakı qarsy ekenin ońaı anyqtaýǵa bolady. Bul saıası partıalarǵa qosymsha júk artyp otyr. Endi olar árbir daýys úshin kúresedi. Halyqtyń senimine ıe bolý úshin belsendi dumys isteıdi. 1989 jyly depýtardy saılaǵan kezde osyndaı ádis qoldanylǵan eken. Biraq ol kezde búletenderde «bárine qarsymyn» degen baǵan bolmaǵan. Saılaýshylar unamaǵan kandıdattardyń esimin syzyp tastap otyrypty. Bıylǵy saılaýdyń ózgeshe bolatyny sodan. Odan keıin, álgi kandıdattar qaıys kresloǵa jaıǵasyp alyp, qamsyz otyra almaıdy. Eger jumysy el kóńilinen shyqpasa, jergilikti máslıhat depýttatary olardy qyzmetinen qýyp tastaýǵa quqyly. Jergilikti máslıhat depýtattary votým qabyldaı alady. Eger álgi saılanǵan adam jumysyn jóndi atqara almasa, aýyl turǵyndary keńes quryp, qol jınaıdy. Ózderiniń qarsy ekenderin máslıhat depýtattaryna jetkizedi. Al olar óz kezeginde buqara narazy bolǵan ákimdi qyzmetinen alyp tastaıdy. Muny da saılaýshylardyń quqyǵyn qorǵaýǵa baǵyttalǵan umtymdy qadam dep qabyldaýǵa bolady. Aýyl ákimderin halyqtyń ózi saılaýy shalǵaı eldi mekenderde qordalanyp qalǵan máselelerdi sheshýge qalaı da septigin tıgizedi. Biz tildesken maman osylaı deıdi. Eldegi saılaý kemeline áli kele qoımaǵan shyǵar. Biraq munyń ózi siresken seńniń birte-birte sógile bastaǵanyn ańǵartsa kerek».