Qazaq kınosyna eńbegi sińgen akter Murat Bısembın 8 qańtarda dúnıeden ótti. Qaraly habardy marqumnyń qyzy áleýmettik jelide jarıalady. Aqshamnews.kz tilshisi onyń keńinen tanylǵan jobalary men oınaǵan rólderin eske túsirip ótti.
"Reketır" (2007)
90-jyldardaǵy Almatynyń qylmys álemi, "kóshedegi zań", kúsh pen yqpal úshin arpalysqan toptar týraly oqıǵa. Fılmde Murat Bısembın Rýslan esimdi qylmys álemindegi salmaǵy bar keıipkerdi somdaıdy. Dál osy rólden keıin akterdiń tanymaldyǵy artyp, kóptegen jobaǵa shaqyrtýlar túsip bastaǵan edi. Tipti osy týyndydan keıin Bısembındi bári "Rýslan bratan" dep atap ketken bolatyn.
"Aǵaıyndylar" (2009)
Úsh aǵaıyndynyń ómiri, minez-qulqy men tańdaýy, otbasylyq baılanys pen turmystyq qaıshylyqtar órbıtin serıal. Ulttyq arnadan kórgen telehıkaıada da Murat Bısembın Rýslan rólinde oınaıdy. "Reketırdegi" keıipkerlerdiń birnesheýi qatar túsetin bul týyndy da kórermenniń kóńilinen shyqqan edi.
"Skaz o rozovom zaıse" (2010)
Almatyǵa jańa kelgen stýdent Erlannyń úlken qala zańyna beıimdelý jolyndaǵy aýyr synaqtary sýretteletin fılmde Murat Bısembın Chýkot esimdi keıipkerdi oınaıdy. Aıta keteıik, atalmysh fılmniń ekinshi bólimi bıyl kórermenge qaıta jol tartty.
"Ryvok" (2010)
Aýyr jaraqattan keıin sportqa qaıta oralýǵa tyrysatyn Qanat esimdi jasóspirimniń oqıǵasy jaıly kınotýyndyda Bısembın jattyqtyrýshynyń rólinde oınaıdy. Motıvasıalyq sporttyq drama 2010 jyly jaryq kórip, kópshiliktiń kóńilinen shyqqan edi.
"Brat ılı brak" (2017)
Keıingi jyldardaǵy kórermenniń súıikti komedıasyna aınalǵan "Brat ılı brak" fılminiń búginde úshinshi bólimi shyqqan. Aıdar esimdi qarapaıym jigittiń súıgen qyzy Gaýharǵa úılengisi keledi. Biraq onyń bes aǵasy "jigit saǵan laıyq pa?" degen suraqpen jolyn kesedi. Komedıa dál osy "aǵalyq baqylaýdan" ótýdiń qyzyq-qaljyńǵa toly tartysyna qurylǵan. Murat Bısembın múnda Gaýhardyń Asan esimdi qatal aǵasyn somdaıdy.
"Tomırıs" (2019)
Akterdiń syrqattanbaı turyp keıingi túsken jobalarynyń biri Aqan Sataevtyń - "Tomırıs" tarıhı fılmi. Saq dáýiri, Tomırıs hanshaıymnyń taǵdyry men eldik joly, taıpalardyń birigýi men syrtqy qaýip-qaterge qarsy turý ıdeıasy kórinis tabatyn týyndyda Murat Bısembın basty rólderdiń biri Spargap beınesin somdaıdy.
Murat Bolatuly Bısembın - Qyzylordada dúnıege kelgen. Qorqyt Ata atyndaǵy Qyzylorda ýnıversıtetin ınjener-elektrık mamandyǵy boıynsha támamdaǵan. Ol sportpen turaqty aınalysyp (boks, aýyr atletıka, bodıbıldıng, paýerlıftıng), "Habar" arnasyndaǵy "Arena" sporttyq baǵdarlamasynyń júrgizýshileriniń biri boldy. Marqum otbasyly, úsh balanyń ákesi bolatyn.
2024 jyldyń qyrkúıeginde oǵan uıqybez obyry dıagnozy qoıylyp, em qabyldap bastady. Alaıda 2025 jylǵy jeltoqsanda ınsýltten keıin shuǵyl aýrýhanaǵa jetkizilip, 2026 jyly 8 qańtarda máńgilik saparǵa attanǵan málim boldy.