Almaty ákimi Darhan Satybaldy jumys sapary barysynda qaladaǵy medısınalyq uıymdardy jańǵyrtý jumystarynyń barysymen tanysty.
Atap aıtqanda, qala basshysy qaıta jańǵyrtý jumystary aıaqtalǵan №4 Qalalyq klınıkalyq aýrýhananyń qabyldaý bólimin aralap kórdi. Jańǵyrtý nátıjesinde qabyldaý bólimi táýligine 250 adamnan 450 adamǵa deıin qabyldaı alatyn boldy.
Halyqaralyq triage pasıentterdi suryptaý júıesi engizildi. Bul júıe pasıentter legin qyzyl, sary jáne jasyl aımaqtarǵa bólýge negizdelgen. Mundaı tásil aýyr haldegi naýqastarǵa jedel kómek kórsetýge, asqynýlar men ólim-jitim qaýpin azaıtýǵa, oryn sanyn tıimdi paıdalanýǵa jáne aýrýhanaǵa jatqyzý merzimin qysqartýǵa múmkindik beredi.
Aýrýhanada zamanaýı ota bólmeleri, 12 orynǵa arnalǵan anestezıologıa, reanımasıa jáne qarqyndy terapıanyń shuǵyl bólimshesi ashyldy. Sonymen qatar, teri arqyly júrek tamyrlaryn emdeý ortalyǵy jumysyn bastady. Bul júrek-qan tamyrlary aýrýlary bar naýqastarǵa joǵary tehnologıalyq medısınalyq kómek kórsetý múmkindigin keńeıtedi.
«Memleket basshysynyń tapsyrmasymen Almatyda qazirgi zamanǵy talaptar men halyqaralyq densaýlyq saqtaý standarttaryn eskere otyryp, medısınalyq ınfraqurylymdy júıeli túrde jańartý jumystary júrgizilip jatyr. 2025 jyly 4 medısınalyq-sanıtarlyq alǵashqy kómek ortalyǵy jáne 1 emhana salyndy, sondaı-aq taǵy 32 nysandy salý jáne jańǵyrtý boıynsha jobalar ázirlenip jatyr», – dedi Darhan Satybaldy.
№4 Qalalyq klınıkalyq aýrýhana – táýlik boıy jumys isteıtin kópsalaly stasıonar. Munda jyl saıyn 12 500-ge deıin ota jasalady.
Sondaı-aq, Almaty ákimi Túrksib aýdanyndaǵy Altaı shaǵynaýdanynda bir aýysymda 500 adamdy qabyldaı alatyn jańa emhananyń qurylys alańyna bardy.
Jańa emhana buryn jumys istemeı turǵan densaýlyq saqtaý nysanynyń ornyna salynyp jatyr. Mekemeni últradybystyq zertteý apparattary, sıfrlyq flúorografıa jáne mammografıa, rentgen, MRT jáne KT jabdyqtaryn qosqanda, zamanaýı dıagnostıkalyq júıelermen jabdyqtaý josparlanǵan. Bul tekserýlerdiń jyldamdyǵy men dáldigin edáýir arttyryp, medısınalyq-sanıtarlyq alǵashqy kómektiń biryńǵaı standarty aıasynda medısınalyq qyzmet sapasyn qamtamasyz etýge múmkindik beredi. Qurylys jumystaryn osy jyldyń İV toqsanynda aıaqtaý josparlanyp otyr.