Roza Baǵlanova 1922 jyly 1-qańtarda dúnıege kelgen
Qazaqtyń bulbul ánshisi Roza Baǵlanovanyń 100 jyldyǵyna oraı #RozaBaǵlanova100 jyl chellendjin bastaldy. Bul týraly Almaty-akshamy.kz Qazaqkonserttiń baspasóz qyzmetine silteme jasap habarlaıdy.
Jańa 2022 jyl kúntizbesiniń alǵashqy paraǵyn qazaqtyń bulbul ánshisi Roza Baǵlanovanyń 100 jyldyq mereıtoıy ashady.
Qazaqstannyń jáne KSRO-nyń halyq ártisi, Halyq qaharmany Roza Baǵlanova 1922 jyly 1-qańtar kúni dúnıege kelgen. Bar ǵumyryn qazaq óneriniń órkendeýine arnaǵan Roza Tájibaıqyzy jarty ǵasyrdan astam ýaqyt boıy «Qazaqkonsert» uıymynda eńbek etken.
Osyǵan oraı Roza Baǵlanovamen áriptes bolyp, tálimin alǵan Qazaqkonsert ánshileri alǵashqylardyń biri bolyp #RozaBaǵlanova100jyl mýzykalyq chellendj usyndy. Áleýmettik jelide taralyp jatqan jańa chellendjdi Qazaqstannyń halyq ártisi Roza Rymbaeva bastady. Ol barsha qazaqstandyqtardy quttyqtap, estafetany «Bulbul» serıalynda Roza Baǵlanovanyń obrazyn sheber somdaǵan jas aktrısa, «Astana múzıkl» teatrynyń ártisi Zarına Jakenovaǵa joldady.
Eske salsaq, ótken jyly 24 qarashada IýNESKO-nyń (BUU Bilim, ǵylym jáne mádenıet jónindegi uıymy) 2022-2023 jyldarǵa arnalǵan halyqaralyq mereıtoılar tizimi qabyldanyp, oǵan Qazaqstannyń usynysymen Ahmet Baıtursynulynyń 150 jyldyǵy men Roza Baǵlanovanyń 100 jyldyǵy endi. Osylaısha, Qazaqstannyń qos tulǵasynyń mereıtoılary IýNESKO kóleminde atalyp ótpek.