Olar Kalınıngrad oblysynan tabylǵan.
Uly Otan soǵysynda qaza tapqan qazaqstandyq bes jaýyngerdiń súıegi jerlengen jer tabyldy, dep habarlaıdy Almaty-akshamy.kz
Endi olar qaza tapqandardyń týystaryn tabýǵa kómek surap otyr.
«Maıdan joly» izdestirý-zertteý otrádynyń komandıri Aleksandr Shıtovtyń aıtýynsha, «Sovest otrádynyń izdeýshileri Bagratıonovskıı aýdanyndaǵy Kornevo (burynǵy Sınten) aýyly mańynan beıitterdi tapqan.
Qaza tapqandar 1945 jyldyń aqpan-naýryzynda fashısik topty talqandaýǵa qatysqan. Olardyń arasynda qazaqstandyqtar da bar. Ol - Qyzyl Armıa jaýyngeri Ivan Stepanovıch Rýdınskıı. Ol 1902 jyly Aqtóbe oblysy Dala aýdanyna qarasty Herson aýylynda dúnıege kelgen.
Atqysh Ivan Rýdınskııdiń sońǵy qyzmet orny 55-gvardıalyq atqyshtar dıvızıasynyń 166-gvardıalyq Qyzyl Týly atqyshtar polki bolǵan. Ol 1945 jyly naýryzda qaza bolǵan.
Aqtóbede 1902 jyly týǵan qyzyl ásker soldaty Ivan Mıhaılovıch Solovevtiń súıegi tabylǵan. 1943 jyly 26 jeltoqsanda Qaraǵandy qalasy Lenın aýdany Lenın RVK arqyly maıdanǵa jumyldyrylǵan. Jaýynger 1945 jyly 27 aqpanda qaıtys bolǵan.
Taǵy bir jaýynger - brıgadır Alekseı Andreevıch Shelýhın. 1912 jyly Kýrsk oblysy, Sıneev aýdany, Lýg keńsharynda dúnıege kelgen. Shyǵys Qazaqstan oblysy Zyrán aýdany Zyrán RVK arqyly 1941 jyly shildede maıdanǵa jumyldyrylǵan. Muraǵat derekterine sáıkes, atqyshtar rotasynyń starshınasy 55-gvardıalyq Irkýtsk-Pınsk dıvızıasynyń 166-gvardıalyq Qyzyl Týly atqyshtar polkiniń quramynda shaıqasqan.
Sondaı-aq, 1906 jyly týǵan leıtenant Hamıt Turlbenuly (Turlbekuly, Turhebetuly) Egeýbaevtyń súıegi tabyldy. Týǵan jeri – Qazaq KSR, Aqmola oblysy, Atbasar aýdany, №7 aýyl. Hamıt Egeýbaev tank komandıri, 213-jeke tank Orsha Qyzyl Tý ordendi brıgadasynyń quramynda soǵysqan. 1945 jyly naýryzda qaza tapty.
Sol jerleýden gvardıa leıtenanty Ivan Alekseevıch Kolpakov tabyldy. 1922 jyly Soltústik Qazaqstan oblysy, Aıyrtaý aýdany, Chalqar aýylynda dúnıege kelgen. Jaıaý ásker vzvodyna qolbasshylyq etken. Sońǵy qyzmet orny 55-gvardıalyq Irkýtsk-Pınsk dıvızıasynyń 166-gvardıalyq Qyzyl Týly atqyshtar polki bolǵan. 1945 jyly naýryzda qaza tapqan.
«Beı-jaı qaramaıtyndardyń bárinen qaza bolǵan jerlesterimizdiń týystaryn izdeýge kómektesýin suraımyz», - dep shaqyrdy Aleksandr Shıtov.