Oqıǵa kórkem gımnastıkadan Dohada ótken álem kýbogy kezeńinde bolǵan
Halyqaralyq gımnastıka federasıasy qossyraq jarysynyń júldegerlerin marapattaý rásimine keýdesine Z árpin jabystyryp kelgen reseılik gımnast Ivan Kýlákti bir jylǵa sporttan shettetti. Bul týraly federasıanyń baspasóz qyzmeti málimdedi, dep habarlaıdy Almaty-akshamy.kz Tengrinews.kz-ke silteme jasap.
Federasıanyń tártiptik komısıasy 20 jastaǵy sportshy Halyqaralyq gımnastıka federasıasynyń jarǵysyn, onyń tártiptik jáne etıkalyq kodeksterin, sondaı-aq tehnıkalyq reglamentterdi buzdy degen qorytyndyǵa kelgen. Kýlák qola júldeni jáne 500 shveısarıalyq frank kólemindegi aqshalaı syılyqty qaıtaryp, 2 myń frank kólemindegi sot shyǵyndaryn tóleýi kerek.
Oqıǵa bıyl naýryzda kórkem gımnastıkadan Dohada ótken álem kýbogy kezeńinde bolǵan. Sol kezde sporttyq gımnastıkadan jasóspirimder arasyndaǵy Reseı chempıony paralel qossyraqtan qola júlde jeńip alǵan.
Marapattaý rásiminen túsirilgen kadrlarda Kýláqtiń kıimine Z árpi jabystyrylǵany kórsetilgen. Z jáne V áripteri Reseı áskeriniń Ýkraınaǵa basyp kirýiniń sımvoly retinde belgili. Olar kóbine reseılik áskerı tehnıkaǵa jazylady.
"Bilesiz be, ol bizben aqyldaspady. Bul onyń jeke bastamasy ekeni sózsiz. Bizdiń jigitter - Reseıdiń patrıottary. Ol bizge eshteńe aıtpady", - dedi sporttyq gımnastıkadan Reseı quramasynyń aǵa bapkeri Valentına Rodıonenko.
Ýkraınada soǵys bastalǵannan keıin kóptegen halyqaralyq uıym reseılik jáne belorýs sportshylaryn jarystarǵa qatysýdan shettetken. Keıbirin, mysaly, shahmatshy Sergeı Karákın men júzýshi Evgenıı Rylov Reseıdiń Ýkraınaǵa basyp kirýin ashyq qoldaǵany úshin jeke jazaǵa ushyraǵan.