Ózbek ǵalymdary jańa vaksına jasap shyǵardy
Ózbekstan Respýblıkasy Ǵylym Akademıasynyń Genomıka jáne bıoınformatıka ortalyǵynyń ǵalymdary qyzanaqtan COVID-19 ınfeksıasyna qarsy vaksına jasady, dep habarlaıdy almaty-akshamy.kz
«Qyzanaqty as retinde paıdalanǵanda, ol asqazanda ydyrap, antıdene túzedi. Tájirıbe aıasynda bizder Ózbekstanda tabylǵan koronavırýsty alyp, onyń bir bóligin klondap, ósimdik jasýshasyna engizý arqyly tekserip kórdik. Nátıjesinde vaksına shynymen ósimdik jasýshasynan bólinýde», - deıdi ortalyq dırektory Zabardast Býrıev.
Onyń aıtýynsha, azyq-túlikpen vaksına jasaý tájirıbesi Reseı men Kanadada sút pen júgeri sıaqty ónimderde qoldanylýda. Olardyń klınıkalyq synaqtary da aıaqtalýǵa jaqyn. Ortalyq dırektorynyń málimetine qaraǵanda, qyzanaqta sıntezdelgen koronavırýstyń S-aqýyzy asqazan arqyly ishekke enip, ımýndyq júıeni oıatady. Osylaısha paıda bolǵan antıdeneler qozdyrǵyshpen kúrese bastaıdy. Mundaı vaksınalar balalar úshin óte qolaıly. Qazirgi kezde vaksına zerthanada jetilý prosesinde. Sodan keıin ony tyshqan, qoıan jáne egeýquıryq syndy janýarlarda synaqtan ótkizilip, nátıjeleri taldanady. Jospar boıynsha synaqtardyń bıyl aıaqtalýy kózdelgen. Mamandardyń aıtýynsha, qazir koronavırýsqa qarsy vaksına Kanadada temeki men júgeriden, al Reseıde bıokefırden, ıaǵnı sút ónimderinen alynady. Vaksınalyq ónim asqazan arqyly ishekke ótedi jáne ishekte antıdenelerdiń sińýi nátıjesinde organızmde ımýndyq júıeniń jumysyna baılanysty koronavırýsqa qarsy ımýnıtet paıda bolady.