Úkimet otyrysynda Oljas Bektenov elimizdiń 12 óńiri zardap shekken tasqynynyń aýqymyn atap ótti.
«Jaǵdaıdy Memleket basshysy óziniń jeke baqylaýynda ustap otyr. Apatpen kúresýge qoldaǵy barlyq resýrstar men kúshter jumyldyryldy. Memlekettik organdardyń, iri bıznes ókilderiniń, belsendi azamattar men eriktilerdiń birlesken kúsh-jigeriniń arqasynda aýqymdy jumys júrgizildi. Qajetti medısınalyq jáne psıhologıalyq kómek kórsetildi. Adamdar ýaqytsha baspanamen, tamaqpen jáne kúndelikti ómirge qajetti zattarmen qamtamasyz etildi. Búkil halyq bolyp Memleket basshysynyń úndeýine qulaq asyp, sý basqan óńirlerge qol ushyn sozdy. Bárine járdem berildi», — dep atap ótti Oljas Bektenov.
Zardap shekkenderge qajetti kómek kórsetildi. Máselen, ótinish bergen barlyq otbasy 100 AEK mólsherinde birjolǵy tólem aldy. Keltirilgen zalaldy baǵalaý jumystarynan soń qıraǵan nemese búlingen múlik úshin 150 AEK-ke deıin ótemaqy tólendi. Sonymen qatar otbasylarǵa 9 myńnan astam úıdi jóndeýge qarajat tólenip, naryqtan 6 myńǵa jýyq páter men úı satyp alyndy. Búgingi tańda 2 576 úı salyndy, Aqmola jáne Batys Qazaqstan oblystaryndaǵy 104 nysanda jumystar bitýge jaqyn. Úkimet basshysy jańa turǵyn úılerdi tez arada aıaqtap, baspanalardy turǵyndarǵa tapsyrý qajettigine nazar aýdardy.