«Quqyqtyq dárihana» jobasy almatylyqtarǵa óz quqyqtaryn qorǵaýǵa jáne quqyqtyq saýattylyǵyn arttyrýǵa kómektesedi

Almaty qalasynyń prokýratýrasy halyqtyń quqyqtyq saýattylyǵyn arttyrýǵa baǵyttalǵan «Quqyqtyq dárihana» atty áleýmettik jobany júzege asyrýdy jalǵastyryp keledi. Bul bastama 2025–2030 jyldarǵa arnalǵan «Zań jáne Tártip» ıdeologıasyn ilgeriletý tujyrymdamasy aıasynda iske asyrylýda jáne óz tıimdiligin dáleldep úlgerdi. 2025 jyldyń maýsym aıynan bastap joba aıasyndaǵy keńes berý oryndary qalanyń úsh saýda-oıyn-saýyq ortalyǵynda jumys isteıdi. Búgin kezekti aksıa «Dostyk Plaza» saýda ortalyǵynda ótti. Munda árbir qala turǵyny prokýratýra qyzmetkerlerinen tegin quqyqtyq kómek ala aldy. — Biz jobany bıylǵy maýsym aıynda bastadyq, osy ýaqytqa deıin myńnan astam ótinish qabyldadyq, — dedi Almaty qalasy prokýratýrasynyń bólim bastyǵy Ádil Qarymsaqov. Onyń aıtýynsha, azamattar túrli máselelermen júginedi. Máselen, alıment tóleý mindettemeleri, qylmystyq isterdiń tergelýi jáne alaıaqtyq, ásirese ınternet arqyly jasalatyn alaıaqtyqtar boıynsha shaǵymdar kóp túsedi eken. Alaıaqtar ózderin bank nemese memlekettik organ qyzmetkerleri retinde tanystyryp, adamdardy aldap soǵady. – Biz, ásirese, qart azamattarǵa óz derekterin bermes buryn jáne aýdarym jasamas buryn týystarymen keńesýge keńes beremiz, – dep atap ótti Ádil Qarymsaqov. «Quqyqtyq dárihana» jobasy azamattar men prokýratýra ókilderiniń tikeleı baılanys alańy retinde uıymdastyrylǵan. Úsh saǵat boıy zańgerler suraqtarǵa jaýap berip, aryz jazýǵa kómektesip, ótinishterin sol jerde tirkeı alady. Basty maqsat – halyqqa jaqyn bolý, ásirese memlekettik organdarǵa sırek júginetin jáne qaıda barý kerek ekenin bilmeıtin adamdarǵa kómek kórsetý. Jol-kólik oqıǵasyna qatysty másele boıynsha keńes alǵan almatylyq Serafıma Zınoveva óz pikirin bylaı bildirdi: – Maǵan bárin egjeı-tegjeıli túsindirip berdi, qandaı qadamdar jasaý keregin aıtty. Endi óz azamattyq quqyqtarymdy qalaı qorǵaý keregin bilemin. Buǵan deıin tek jeke zańgerlerge júginetinmin, al prokýratýradan tegin keńes alyp, óte rıza boldym, – dedi turǵyn. Turǵynnyń aıtýynsha, mundaı bastamalar qoǵam úshin óte mańyzdy. Óıtkeni, kóptegen adam óz quqyǵyn bilmeıdi. Osyndaı jobalar máseleni sheshýge úmit syılap qana qoımaı, quqyqtyq saýattylyqty arttyrady. Almaty qalasynyń prokýratýrasy jobany jalǵastyryp, aksıalardyń geografıasyn keńeıtýdi josparlap otyr. «Quqyqtyq dárihana» kóptegen adamǵa qol ushyn sozdy, al turǵyndardyń ótinishteri kún sanap artyp keledi. Bul – qoljetimdi quqyqtyq kómektiń qoǵamǵa asa mańyzdy ekenin dáleldeıdi.