Altyndy Almaty áýejaıy arqyly Birikken Arab Ámirlikterine zańsyz áketpek bolǵan.
Kontrabanda memlekettik baqylaýdy aınalyp ótip, kólik polısıasynyń laýazymdy tulǵalaryna para berý arqyly júzege asyryldy, dep habarlaıdy Almaty-akshamy.kz Polisia.kz-ke silteme jasap.
İshki ister mınıstrliginiń uıymdasqan qylmysqa qarsy kúres jáne ózindik qaýipsizdik jónindegi bólimsheleri Almaty qalasynyń halyqaralyq áýejaıy arqyly Birikken Arab Ámirlikterine baǵaly metaldardy zańsyz áketýdi júzege asyrmaq bolǵan qylmystyq top qyzmetiniń jolyn kesti.
Almaty qalasynyń halyqaralyq áýejaıynda Kóliktegi polısıa departamentiniń Uıymdasqan qylmysqa qarsy kúres basqarmasynyń qyzmetkerine kedendik jáne shekaralyq baqylaý aımaǵy arqyly «sálemdemeni» alyp ótýi úshin 600 AQSH dollary somasynda para berý áreketi kezinde Qazaqstan Respýblıkasynyń azamaty ustaldy. Jeke tekserý barysynda odan 1200 AQSH dollary tárkilendi.
Jedel-izdestirý sharalaryn júrgizý nátıjesinde áýejaı ǵımaratynda QHR azamaty ustaldy, ol kúdiktiniń sybaılasy bola otyryp, altyndy áýe arqyly Almatydan Dýbaıǵa jetkizýi kerek bolǵan. Onyń sómkesinen polısıa qyzmetkerleri salmaǵy 3 kg 200 gr. bolatyn altyn quımalaryn tapty. Onyń quny shamamen 84 mln teńgeden asady.
Tergeý sotynyń sanksıasymen qazaqstandyq kúdiktiniń turǵylyqty jeri boıynsha Almatydaǵy kotejderdiń birinde tintý júrgizildi. Onda quımalardaǵy altyn men metaldyń mólsherin anyqtaıtyn elektrondyq tarazy men arnaıy qurylǵylar tárkilendi. Qazirgi ýaqytta kúdiktilerdi ýaqytsha ustaý ızolátoryna qamaý týraly másele sheshilýde. Tergeý qymbat metaldyń shyǵý kózin jáne qylmystyq toptyń basqa da sybaılastaryn anyqtaýda.