Arandatýshylyq sózder men shaqyrýlarǵa berilmeýge shaqyrdy.
Qazaqstan Respýblıkasy Bas prokýrorynyń orynbasary B.B. Dembaev qazaqstandyqtarǵa úndeý jarıalady, dep habarlaıdy Almaty-akshamy.kz QazAqparatqa silteme jasap.
2022 jyldyń aqpan aıynan bastap buqaralyq aqparat quraldary men áleýmettik jelilerde Reseı Federasıasy men Ýkraına arasyndaǵy qaqtyǵysqa qatysty materıaldar (jarıalanymdar, beınesújetter, habarlamalar, pikirler) belsendi jarıalanýda.
Bul rette olardyń ishinen jekelegen jandar Qazaqstan azamattaryn osy janjalǵa qatysýǵa shaqyrýlarmen, ulttyq arazdyqty qozdyrý, eki taraptyń da azamattarynyń ulttyq ar-namysy men qadir-qasıetin qorlaý belgileri bar qasaqana arandatýshylyq málimdemelermen jáne kórineý jalǵan aqparatpen súıemeldenedi.
Budan bólek, áleýmettik jelilerdiń keıbir paıdalanýshylary, sonyń ishinde Qazaqstan azamattarynyń arasynan bolyp jatqan oqıǵalarǵa jarıa túrde túsindirme bere otyryp, olarǵa elimizdiń aýmaǵynyń tutastyǵyna qatysty separatıstik úndeýlerdi ornalastyrýda.
Bul áreketterge Qazaqstan Konstıtýsıasymen, bizdiń elimiz qatysýshy bolyp tabylatyn jalpyǵa tanylǵan halyqaralyq-quqyqtyq qujattarmen tyıym salynǵan.
Qoǵamdyq qaýipsizdikti qamtamasyz etý, azamattardyń quqyqtary men bostandyqtaryn qorǵaý, qoǵamdyq-saıası jaǵdaıdyń turaqsyzdanýyna jol bermeý maqsatynda buqaralyq aqparat quraldary men áleýmettik jelilerde osyndaı arandatýshylyq sózder men shaqyrýlarǵa berilmeýge shaqyramyz.
Qazaqstan azamatynyń shet memleket aýmaǵyndaǵy soǵys qımyldaryna qasaqana quqyqqa qaıshy qatysýy, sol sıaqty ulttyq alaýyzdyqty qozdyrýǵa baǵyttalǵan qasaqana is-áreketter, buqaralyq aqparat quraldaryn nemese telekomýnıkasıa jelilerin paıdalana otyryp, Qazaqstannyń tutastyǵyn, onyń aýmaǵyna qol suǵylmaýyn jáne bólinbeýin buzýǵa jarıa túrde shaqyrý qylmystyq jazalanatyn áreketter bolyp tabylatynyn (QK-niń 172, 174, 180-baptary) jáne 10 jylǵa deıin bas bostandyǵynan aıyrýǵa ákep soqtyratynyn túsindiremiz.
Sonymen qatar, Qazaqstan Respýblıkasy Qylmystyq kodeksiniń 274-babyna sáıkes qoǵamdyq tártipti buzý nemese azamattardyń nemese uıymdardyń quqyqtary men zańdy múddelerine ne qoǵamnyń nemese memlekettiń zańmen qorǵalatyn múddelerine, onyń ishinde buqaralyq aqparat quraldaryn nemese telekomýnıkasıa jelilerin paıdalana otyryp, eleýli zıan keltirý qaýpin týǵyzatyn kórineý jalǵan aqparat taratqan úshin jeti jylǵa deıin bas bostandyǵynan aıyrý kózdelgenin eskertemiz.