Halyqaralyq áýe kóligi qaýymdastyǵynyń (IATA) baǵalaýynsha, álem boıynsha jolaýshylardyń 52%-y tek qol júgin alyp saıahattaýdy jón kórse, 48%-y tirkelgen joljúk rásimdeıdi, dep habarlaıdy aqshamnews.kz FlyArystan áýe kompanıasynyń baspasóz qyzmetine silteme jassap.
Atap ótilgen mańyzdy jaıttardyń biri: qol júgin júk sórelerinde ornalastyrý jolaýshynyń jaýapkershiligi sanalady.
Bortserikter bos oryndar jaıly habarlap, salon ishinde baǵyt berýge kómektese alady, alaıda qol júgin kóterip qoıý nemese ony oryn aýystyryp ornalastyrý qyzmetin oryndamaıdy.
Jolaýshylardyń jaılylyǵyn qamtamasyz etý úshin áýe kompanıasy birneshe keńes te usyndy.
Júk sóreleri – salondaǵy ortaq keńistik
Júk sórelerindegi oryn naqty bir jolaýshyǵa nemese orynǵa bekitilmeıdi. Bul – Eýropa men Azıadaǵy iri loýkosterler ustanatyn halyqaralyq avıasıalyq standart.
Qol júgin ornalastyrý qaǵıdasy: "kez kelgen bos sóreni kez kelgen jolaýshy paıdalana alady".
Eger ornyńyzdyń ústińizdegi sóre basqa jolaýshylardyń qol júginen nemese maýsymdyq kıimderinen tolyp qalsa, siz kórshi basqa kez kelgen bos sórelerdi, sondaı-aq salonnyń ortalyq bóligindegi bos sórelerdi paıdalana alasyz. Bul – keńistikti birkelki bólýge jáne barlyq jolaýshylardyń jaılylyǵyn saqtaýǵa arnalǵan qalypty, josparly tájirıbe.
Aldyńǵy oryndyq astyndaǵy keńistikti paıdalaný
Aldyńǵy oryndyqtyń astyndaǵy keńistik – jeke zattaryńyzdy, shaǵyn sómke nemese arqa- sómkeni ornalastyrýǵa arnalǵan aımaq. Ásirese, arqa-sómkelerdi munda qoıý óte yńǵaıly: olar jaqsy sıady, pishinin saqtaıdy jáne júk sóresinen ornyn almaıdy. Bul aımaqty paıdalaný keńistikti tıimdi bólýge jáne otyrǵyzý prosesin jyldamyraq ári tártippen ótkizýge kómektesedi.
Mańyzdy erekshelik: apattyq shyǵý qatarlarynda (FlyArystan-de 12–13 qatar) otyrǵan jolaýshylar zattaryn oryndyq astyna qoıa almaıdy, sebebi shyǵýǵa ótý joly qaýipsizdik talaptaryna saı tolyqtaı bos bolýy tıis.
Zat kólemi artqanda qoljetimdi qosymsha qyzmetter
Saıahat formatyna baılanysty zat kólemi de ózgeretini túsinikti. Sondyqtan FlyArystan jolaýshylarǵa aldyn ala qolaıly nusqalardy tańdaýdy usynady:
"10 kg qol júgi" qyzmeti – salmaq normasyn arttyrýǵa múmkindik beredi.Bul jeke zattaryn júk bólimine tapsyrmaı saıahattaǵysy keletinder úshin qolaıly. Bul rette, ólshemder ózgermeıdi (56 × 23 × 36 sm), sol arqyly sórelerdiń syıymdylyǵyn saqtaýǵa múmkindik beredi.
Eger zat kólemi qol júginiń bazalyq normasynan kóp nemese iri bolsa, tirkelgen joljúk rásimdeý usynylady.
Eki qyzmetti de bıletti satyp alý kezinde nemese saıttaǵy/qosymshadaǵy jeke kabınet arqyly aldyn ala rásimdegen yńǵaıly.
Saıahattaýshylar úshin praktıkalyq keńester
Ushaqta qajet bolatyn zattardy aldyn ala shyǵaryp qoıǵan durys. Bul keıinnen olardy izdep, ótý jolyn nemese sóreni bógep qalmaýǵa kómektesedi.
Eger qol júgińiz jumsaq bolsa, múmkindiginshe ony tik qoıyńyz — bul sóreniń eni boıynsha kóbirek oryn únemdeýge múmkindik beredi.
Ústińgi kıimdi aldyńǵy oryndyqtardaǵy ilgishterge ornalastyrǵan jón (apattyq shyǵý qatarlarynan basqa).
Qatty korpýsty shabadandar kóbirek oryn alady, sondyqtan múmkin bolsa, jumsaq sómke nemese arqa-sómkesin tańdańyz.
Aýyr zattardy sómkeniń tómengi bóligine qoıýǵa tyrysyńyz. Bul qol júginiń yqsham pishinin saqtap, ony sórege ornalastyrýdy jeńildetedi.
Eger otbasymen nemese toppen saıahattasańyz, qoljetimdi keńistikti barynsha tıimdi paıdalaný úshin zattardy sórelerge utymdy bólip ornalastyryńyz.