Ál-Farabı atyndaǵy Qazaq ulttyq ýnıversıtetindegi birqatar oqý korpýstarynyń shatyryna kún panelderi ornatyldy, - dep habarlaıdy Aqshamnews.kz.
Atap aıtqanda, Ekonomıka jáne bıznes joǵary mektebi, jýrnalısıka, zań, tarıh, geografıa, bıologıa, fılologıa jáne medısına fakúltetteriniń ǵımarattary kún panelderimen jabdyqtaldy.
Atalǵan joba energıany únemdeýge jáne elektr qýatyna ketetin shyǵyndy aıtarlyqtaı azaıtýǵa septigin tıgizedi.
Energıa óndirý stansıasy kelisim sheńberinde Qytaı tarapymen birlesip 20 myń sharshy metr aýmaqqa salyndy. Joba iske qosylǵannan keıin oqý ordasynyń elektr energıasyna degen qajettiliginiń bir bóligi balamaly kózder arqyly qamtamasyz etiletin bolady. Bul stýdentter men qyzmetkerlerge turaqty, ekologıalyq taza energıany paıdalanýǵa múmkindik beredi, sonymen qatar ýnıversıtettiń ınovasıalyq ımıjin nyǵaıtady.
Bolashaqta josparǵa sáıkes QazUÝ qalashyǵyndaǵy barlyq fakúltetter men jataqhanalar kún panelderimen qamtamasyz etiledi. Buǵan qosymsha qalashyqtaǵy oqý korpýstary men ákimshilik ǵımarattarynyń, stýdentter úıiniń, ǵylymı ortalyqtardyń shatyrlary tolyq jańartylady. Shatyrdaǵy eski jabyndylar alynyp, tegisteý jumystary júrgizildi. Keıin qara qaǵaz tóselip, sýaǵar júıesi ornatyldy. Atalǵan sharalar nysannyń uzaq merzimge qyzmet etýin qamtamasyz etý baǵytynda atqarylyp jatyr.