Qazaqstanda qumar oıynǵa táýeldilik - lýdomanıanyń aldyn alý baǵytyndaǵy jumys kúsheıtildi, - dep habarlaıdy Aqshamnews.kz.
Týrızm jáne sport mınıstrligi bul máseleni azaıtý úshin 2024-2026 jyldarǵa arnalǵan zańsyz oıyn bıznesi men lýdomanıaǵa qarsy keshendi jospardy júzege asyryp jatyr. Qujat Qazaqstan Úkimetiniń qaýlysymen bekitilgen.
Lýdomanıanyń aýqymy zertteldi
Jospar aıasynda mınıstrlik respýblıka kóleminde áleýmettik zertteý júrgizdi. 6 myń adam qatysqan saýalnama qumar oıyndarǵa táýeldiliktiń sebepteri men taralý deńgeıin anyqtaýǵa múmkindik bergen.
Sonymen qatar:
-
mektep oqýshylary men stýdentterge arnalǵan aldyn alý ádistemeleri ázirlendi;
-
táýeldilikti erte anyqtaýǵa baǵyttalǵan usynymdar daıyndaldy;
-
bilim berý uıymdary men áskerı bólimderde 800-den astam pedagog pen psıholog arnaıy oqytýdan ótti;
-
profılaktıkalyq sabaqtarǵa arnalǵan beınematerıaldar ázirlendi.
Mektepten meshitke deıingi túsindirý jumystary
Keshendi josparǵa sáıkes, birqatar ortalyq memlekettik organdar da profılaktıkalyq sharalarǵa belsendi atsalysty:
-
6 myńnan astam mekteptiń tárbıe josparyna lýdomanıa men ınternetke táýeldiliktiń aldyn alý taqyryptary engizildi;
-
ata-analardy qoldaý ortalyqtarynyń baǵdarlamalary jańartyldy;
-
dinı qyzmetkerlerdiń qatysýymen túsindirý jumystary júrgizilip, 1 mıllıonnan astam adam qamtyldy;
-
joǵary oqý oryndarynda 400-den asa salaýatty ómir saltyn nasıhattaıtyn is-shara ótti;
-
áskerı bólimderde dóńgelek ústelder, konferensıalar men saýalnamalar uıymdastyryldy.
Lýdoman adamdarǵa qandaı kómek kórsetiledi?
Qumar oıynǵa patologıalyq beıimdiligi bar azamattarǵa:
-
medısınalyq-áleýmettik kómek,
-
mamandandyrylǵan ońaltý ortalyqtary arqyly qoldaý,
-
psıhologıalyq keńes berý qyzmetteri usynylady.
Sonymen qatar respýblıkalyq psıhıkalyq densaýlyq ǵylymı-praktıkalyq ortalyǵy bazasynda lýdoman adamdar men olardyń jaqyndaryna arnalǵan koll-ortalyq jumys isteıdi.
2024 jyldyń sáýirinen bastap memlekettik qyzmetshilerge arnalǵan arnaıy semınarlar da turaqty túrde ótkizilip keledi.
Mamandardyń aıtýynsha, qumar oıynǵa patologıalyq beıimdilik halyqaralyq deńgeıde resmı tanylǵan. Ol Halyqaralyq aýrýlar jiktemesinde F63.0 kody boıynsha tirkelgen.
Densaýlyq saqtaý mınıstrliginiń málimetine súıensek:
-
2024 jyly memlekettik medısınalyq uıymdarǵa 69 adam osy dıagnozben júgingen;
-
2025 jyldyń birinshi jartyjyldyǵynda 35 adam medısınalyq kómek alǵan.
Bul derekter lýdomanıanyń aldyn alý boıynsha júıeli jumysty jalǵastyrýdyń mańyzyn kórsetedi.
Týrızm jáne sport mınıstrligi quzyreti aıasynda qoǵamdyq densaýlyqty qorǵaý jáne qumar oıyndarǵa jaýapty kózqarasty qalyptastyrý baǵytyndaǵy profılaktıkalyq sharalardy jalǵastyratynyn málimdedi.