Germanıanyń Fúrt qalasynda halyqaralyq izdeýde júrgen Maqsat Dúısenov ustaldy, - dep habarlaıdy Aqshamnews.kz
Bul aqparatty Qazaqstan Respýblıkasy İshki ister mınıstrligi rastady.
Mınıstrliktiń málimetinshe, Dúısenovti Germanıanyń quqyq qorǵaý organdary QR İİM Interpoldyń Ulttyq ortalyq búrosynyń suraýy negizinde qolǵa túsirgen. Ol Interpol jelisi boıynsha halyqaralyq yntymaqtastyq aıasynda anyqtalyp, keıinnen qamaýǵa alyndy.
«QR İİM Interpoldyń Ulttyq ortalyq búrosynyń suraýy boıynsha, Germanıa Federatıvtik Respýblıkasynyń Fúrt qalasynda halyqaralyq izdeýde júrgen azamat D. ustaldy. İzdeýdegi tulǵa nemis quqyq qorǵaý organdary tarapynan anyqtalyp, qamaýǵa alyndy», – delingen İİM taratqan habarlamada.
Maqsat Dúısenov 2018 jyldyń tamyzynan 2019 jyldyń sáýirine deıin Qazaqstan Respýblıkasynyń bas kólik prokýrory qyzmetin atqarǵan. Ol bul qyzmetke sol kezdegi Bas prokýror Qaırat Qojamjarovtyń buıryǵymen taǵaıyndalǵan bolatyn.
Aıta keteıik, Qaırat Qojamjarovtyń ózi qazirgi ýaqytta qyzmettik ókilettigin asyra paıdalaný jáne qylmystyq kiristerdi zańdastyrý faktileri boıynsha tergelip jatyr.