Ótken aıda bos jumys oryndarynyń sany 1,5 ese ósken.
Ótken aıda Qazaqstanda bos jumys oryndardyń sany artqan. Jumys isteıtin mamandarǵa aýyl sharýashylyǵy muqtaj bolyp otyr, dep habarlaıdy Almaty-akshamy.kz.
«2022 jylǵy maýsymda Elektrondyq eńbek bırjasynda 124,6 myń bos jumys orny jáne 59,9 myń túıindeme ornalastyryldy. Ótken aımen salystyrǵanda bos oryndar sany 1,5 ese, al ózekti túıindemeler sany 31%-ǵa artty», - delingen Eńbekmıni baspasóz qyzmetiniń habarlamasynda.
Mamandardyń aıtýynsha, bos jumys oryndary sanynyń kúrt ósýi barlyq óńirlerde baıqaldy, biraq eń kóbi Aqtóbe (2,5 ese) jáne Jambyl (3 esege jýyq) oblystarynda baıqalyp otyr.
«Nátıjesinde atalǵan óńirler bos jumys oryndary boıynsha birinshi orynǵa shyqty (tıisinshe 12,9 myń jáne 12 myń bos jumys orny). Qaraǵandy oblysy da bos jumys oryndary boıynsha aldyńǵy qatarǵa jaıǵasty (12,6 myń). Bul rette Batys Qazaqstan oblysynda kásiporyndar men fırmalardyń usynysy 5,8%-ǵa – 3,3 myń bos orynǵa deıin azaıdy. Sondaı-aq, usynylatyn jumys oryndarynyń eń az sany Shymkent qalasynda – 3,5 myń jáne Mańǵystaý oblysynda-3,1 myń bos oryn», – dedi «Eńbek resýrstaryn damytý ortalyǵy» AQ Basqarýshy dırektory Aleksandra Molchanovskaıa.
Bos oryndardyń basym bóligin aýyl sharýashylyǵy (10,8 myń bos oryn), turǵyn emes úı-jaılar jáne turǵyn úı obektilerin salý (9,8 myń bos oryn), bilim berý (6,6 myń bos oryn) jáne ózge de qyzmetter (5,8 myń bos oryn) sektorlarynyń kásiporyndary ornalastyrdy. Bul rette aýyl sharýashylyǵy salasynda ornalastyrylǵan bos oryndardyń jartysyna jýyǵy (47%) Jambyl oblysyna, al Shyǵys Qazaqstan jáne Qostanaı oblystarynda – turǵyn úı qurylysy salasynda tıisinshe 33,7% jáne 35%-dan keldi. Elordada qurylys salasyndaǵy jumysshylarǵa joǵary suranys saqtaldy, ıaǵnı bos oryndardyń úshten biri qurylys salasyna tıesili.