QR Áskerı ǵylym akademıasynyń qurylǵanyna 10 jyl tolýyna oraı «Qazaqstan Respýblıkasynyń Áskerı ǵylymyn damytý: problemalary men perspektıvalary» taqyrybynda ǵylymı-praktıkalyq konferensıa ótti, dep habarlaıdy Almaty-akshamy.kz.
Ǵalymdar forýmyna Qarýly Kúshterdiń, basqa da áskerler men áskerı quralymdardyń, Prezıdent janyndaǵy Ulttyq ǵylym akademıasynyń, Indýstrıa jáne ınfraqurylymdyq damý mınıstrliginiń ókilderi, Eýrazıa ulttyq ýnıversıtetiniń profesorlyq-oqytýshylar quramy jáne Qarýly Kúshterdiń ardagerleri qatysty.
Konferensıany Áskerı ǵylym akademıasynyń prezıdenti, zapastaǵy polkovnık Muhtar Serikpaev ashty. Ol óz baıandamasynda áskerı oqý oryndarynda jasyna qaraı magıstratýra men doktorantýrada oqytý máselelerin kóterdi. Onyń pikirinshe, áskerı ǵylymdy damytý jáne memlekettiń ulttyq qaýipsizdigin nyǵaıtý múddesinde Quzyretti ortalyq qurý qajet.
Odan bólek, Prezıdent janyndaǵy Ulttyq ǵylym akademıasynyń vıse-prezıdenti Lázzat Eralıeva, Áskerı ǵylym akademıasynyń birinshi vıse-prezıdenti otstavkadaǵy general-leıtenant Bolat Janasaev, Qorǵanys mınıstrligi Áskerı bilim jáne ǵylym departamentiniń bastyǵy, general-maıor Jumabek Ahmetov, UQK Shekara qyzmetiniń Jaýyngerlik kezekshilik jáne sıtýasıalyq aqparattandyrý departamentiniń bastyǵy, polkovnık Naǵmet Sadyqov, Málik Ǵabdýllın atyndaǵy Azamattyq qorǵanys akademıasy bastyǵynyń oqý jumysy jónindegi orynbasary, polkovnık Qýanyshbek Kármenov, UQÝ Ulttyq ulan fakúltetiniń bastyǵy, polkovnık Saverdın Imırov, EUÝ profesory Altaı Álimǵazın, Abaı Myrzahmetov atyndaǵy Kókshetaý ýnıversıtetiniń profesory, zapastaǵy polkovnık Satybaldy Dilmanov baıandama jasady.
«QR Áskerı ǵylym akademıasy» RQB 2013 jyly áskerı ǵylym men ǵylymı mektepterdiń sabaqtastyǵyn damytý maqsatynda quryldy. Akademıa ǵalymdary Joǵary bilim jáne ǵylym mınıstrliginiń, Qorǵanys mınıstrliginiń, Indýstrıa jáne ınfraqurylymdyq damý mınıstrliginiń, sondaı-aq kúshtik qurylymdardyń múddesi úshin granttyq jáne baǵdarlamalyq-maqsatty qarjylandyrý jobalaryn oryndaıdy.
Birlestik óziniń «ÁǴA-habarshysy» degen atpen ǵylymı jýrnal shyǵarady. Onyń betterinde Ulttyq qorǵanys ýnıversıtetiniń magıstranttary men doktoranttary, Qazaqstan men taıaý shet elderdiń belgili ǵalymdary jarıalanady. 2020 jyly akademıa quramynda Qaýipsizdik jáne arnaıy bilim berý baǵdarlamalary ınstıtýty quryldy. Onyń negizinde aýmaqtyq qorǵanys, jumyldyrý daıyndyǵy, kadrlyq jumysty uıymdastyrý jáne ákimdikterdiń, memlekettik organdardyń jáne basqa da uıymdardyń mamandaryn áskerı esepke alý kýrstary ótkiziledi.
Ataýly kúnge oraı konferensıaǵa qatysýshylar «QR Áskerı ǵylymdar akademıasyna 10 jyl» tósbelgisimen marapattaldy.