Aptasyna 5 kún jumys isteıtin Qazaqstan azamattary shilde aıynda 11 kún demalady.
Shilde aıynda qazaqstandyqtar Astana kúni men Qurban aıt meıramyn toılaıdy, dep habarlaıdy Almaty-akshamy.kz.
Qazaqstan Respýblıkasyndaǵy ulttyq jáne memlekettik merekeler atap ótiletin kúnder elimizdiń eńbek zańdaryna sáıkes mereke kúnderi dep tanylady. Mereke kúnderi jumys istemeıtin kúnder bolyp tabylady. Al bıyl memlekettik mereke sanalatyn Astana kúni 6 shilde seısenbige kelip tur. Qurban aıt meıramy da 20 shilde seısenbige dóp túsedi. Al 3 kúnge sozylatyn bul dinı meıramnyń birinshi kúni elimizde demalys retinde jarıalanǵan. Sondyqtan 6 jáne 20 shilde kúnderi demalys sanalady. Demek, aptasyna 5 kún jumys isteıtin Qazaqstan azamattary shilde aıynda 11 kún demalady.
Aıta keteıik, Oraza aıttan 70 kúnnen keıin toılanatyn Qurban aıtta jaǵdaıy bar ári jolaýshy emes musylmanǵa qurbandyq shalý - ýájip, musylmandyq mindet. Qurbandyqqa túıe, sıyr jáne qoı (eshki de) shalynady. Qurbandyq etiniń bir bóligi ózine qalady, ekinshi bóligi aǵaıyn-týys, kórshilerge beriledi, úshinshi bóligi kómekke muqtaj jandarǵa taratylady.