Eńbek jáne halyqty áleýmettik qorǵaý birinshi vıse-mınıstri Asqarbek Ertaevtyń aıtýynsha, búginde shetelde 126 myń qazaqstandyq eńbek etip júr, dep habarlaıdy aqshamnews.kz
Olardyń ishinde:
102 myńy – Reseıde,
15 myńy – Ońtústik Koreıada,
2 myńy – Ulybrıtanıa men Eýropalyq Odaq elderinde jumys isteıdi.
"Basqa másele – barlyq eldermen eńbek qyzmetin retteý týraly kelisimder jasalmaǵan. Mysaly, Ulybrıtanıamen bıyl tıisti memorandýmǵa qol qoıdyq. Al Ońtústik Koreıamen kelisim jobasy qazir qaralý satysynda. Eki jyl kelissózder júrgizdik, eldegi saıası jaǵdaıǵa baılanysty úzilis boldy. Bıyl kúzde qaıta jalǵastyramyz. Sebebi Koreıada júrgen 15 myń azamattyń 11 myńy zańsyz eńbek etip júr. Bul baǵytta naqty sharalar qabyldaý qajet", – dedi vıse-mınıstr.
Onyń aıtýynsha, ońtústikkoreıalyq tarap Qazaqstan azamattarynyń el aýmaǵynda zańsyz júrýine qatysty sharalar qabyldaýdy talap etip otyr.
"Qazir kelissózder júrip jatyr. Bizdiń ótinimimiz Koreıa tarapynyń qaraýynda. Jyl sońyna deıin oń sheshimge qol jetkizemiz dep úmittenemiz", – dep túıindedi Asqarbek Ertaev.