Oljas Bektenov Almatydaǵy Sorbulaq sý qoımasyndaǵy sýǵa qatysty depýtattyq saýalǵa bergen jaýabynda júrgizilgen zertteýler týraly aıtty, dep habarlaıdy aqshamnews.kz
Onyń aıtýynsha, Sorbulaq jınaqtaǵyshynan alynǵan sý synamalarynyń mıkrobıologıalyq, parazıtologıalyq jáne pestısıdtik kórsetkishteri boıynsha zertteýlerdi Densaýlyq saqtaý mınıstrligi 2024 jyly júrgizgen. Zertteý nátıjesinde keıbir synamalardyń, onyń ishinde mıkrobıologıalyq jáne parazıtologıalyq kórsetkishteri boıynsha, sanıtarlyq talaptarǵa saı kelmeıtini anyqtalǵan.
"2025 jyldyń birinshi jartyjyldyǵynda vırýstyq kórsetkishter boıynsha topyraqtan eki synama alynyp, zertteldi – eshqandaı sáıkessizdik anyqtalǵan joq. Sonymen qatar, Ekologıa jáne tabıǵı resýrstar mınıstrligi Almaty qalasynyń ákimdigine jınaqtaǵyshtaǵy sýdy tek tazartý jumystary júrgizilip, sanıtarlyq jáne parazıtologıalyq normatıvterge sáıkestik qamtamasyz etilgen jaǵdaıda ǵana paıdalanýǵa bolatyny týraly aqparat berdi. Áıtpese, sýdy paıdalaný qorshaǵan orta men halyq densaýlyǵy úshin uzaqmerzimdi jaǵymsyz saldarǵa ákelýi múmkin", – delingen Premer-mınıstrdiń jaýabynda.
Osyny eskere otyryp, gıdrogeologıalyq jáne geologıalyq zertteýler, sondaı-aq ınjenerlik ınfraqurylymǵa qaıta tekserý júrgiziletin bolady. Bul jumystardy júzege asyrý úshin qalalyq máslıhattyń sheshimimen jergilikti búdjetten 120 mln teńge bólindi.
"2025 jylǵy 3 shildede ákimdik "Sorbulaq sý qoımasyndaǵy sýdyń jáne túbindegi shógindilerdiń sapasyn baǵalaý maqsatynda gıdrogeologıalyq jáne geologıalyq zertteýler júrgizý" nysany boıynsha merdiger uıym – "Qazgıprovodhoz ınstıtýty" JSHS-men kelisimshart jasasty. Zertteýlerdi júrgizý merzimi – 9 aı. Jumystardy aıaqtaý 2026 jylǵy sáýirge josparlanǵan", – dep atap ótti Premer-mınıstr.