Qazaqstandyq mamandar ónerkásip salasynda derekterdi óńdeıtin biregeı platforma ázirledi.
Júıe taý-ken metalýrgıa, munaı-gaz jáne óńdeý sektorlarynda jumys isteıtin kásiporyndardaǵy óndiristik jáne bıznes-prosesterdi ońtaılandyrady, dep habarlaıdy Almaty-akshamy.kz Qazaqtv.com saıtyna silteme jasap.
Ol qarapaıym quraldardyń kómegimen derekterdi jınap qana qoımaı, taldaý júrgizýge de múmkindik beredi. Sonymen qatar platforma shıkizat pen energıa resýrstarynyń azaıýy men artyq qoldanylýyn anyqtaıdy. Al óndirýshi osy qurylǵy arqyly óndiris kezinde oryn alǵan barlyq kemshilikter men qatelikterdi baıqaı alady.
«Biz óndiristik kásiporyndardyń jumysyn ońtaılandyrý úshin jasandy ıntellekt elementterin paıdalanamyz. Kompanıa óz jumysyn bastaǵanyna shamamen 4 jyl boldy. Qazaqstanda 10-ǵa jýyq jobany, iri uıymdarmen baılanysy bar jobalardy júzege asyrdyq. Ózimizdiń barlyq jobalarymyzda biz sıfrlyq júıelerdiń, baǵdarlamalardyń tıimdiligin barynsha kórsetýge tyrystyq», - dedi IT-sheshimder boıynsha Qazaqstandyq kompanıanyń basshysy Erjan Janzaqov.
Kompanıa óz múmkindigin ótken jyly Inovasıalyq granttar baıqaýyndaǵy jeńisiniń arqasynda keńeıtkenin aıta ketken jón. Atalǵan baıqaýdyń jeńimpazdarǵa qoıǵan eń negizgi sharttarynyń biri jobalary «noý-haý» uǵymyna saı bolý edi. Sonyń nátıjesinde búginde kompanıa kórshi memleketterdiń naryǵyna shyǵýǵa daıyn.
«Qazaqstan úshin mundaı ónimderdiń bereri óte kóp. Mysaly, basqa elderge osyndaı ónimderdi eksporttaý múmkindigi. Al granttyq qarjylandyrýǵa keler bolsaq, ol QazInnovations tarapynan shamamen 40 mıllıon boldy, al qosa qarjylandyrý nátıjesinde jalpy 55 mln kóleminde qarajat berildi. Onyń basym bóligi baǵdarlamalyq qamtamasyz etýdi ázirleýge, pysyqtaýǵa, onyń ishinde óndiristi uıymdastyrý úshin jabdyqtar satyp alýǵa jumsaldy», - dedi IT-sheshimder boıynsha Qazaqstandyq kompanıanyń basshysy Erjan Janzakov.
Óz múmkindigin paıdalanýdy, keńeıtýdi armandaıtyn basqa da startap-kompanıalar úshin respýblıkada ınovasıalyq granttar konkýrsy uzartyldy. Oǵan qatysýǵa ótinimdi 15 qyrkúıekke deıin berýge bolady.