Budan buryn Beıjiń ulttyq stadıonynda Qysqy Olımpıada oıyndarynyń ashylý saltanaty ótkenin habarlaǵanbyz.
Quramanyń olımpıadalyq ekıpırovkasyn daıyndaýǵa bir jyldan asa ýaqyt ketti, dep habarlaıdy Almaty-akshamy.kz
Qazaqstannyń Memlekettik Týymen shyqqan qazaqstandyq sportshylardyń kıgen kıimi Qytaı halqynyń nazaryn aýdardy.
Tý ustaýshy retinde qazaqtyń mádenı elementterine baı kıim kıgen qos qazaqstandyq sportshyny qytaılyq jeli qoldanýshylary weibo vebsaıtynda (Qytaıdyń Twitter jáne Facebook-ke eliktep jasaǵan áleýmettik jelisi-red.) kóptep qoshemettep jatty.
Kóptegen qytaılyqtar Qysqy Olımpıada oıyndaryndaǵy qazaqtyń tý ustaýshy kıimin ótken jyly Tokıo Olımpıadasy kezindegi qazaqtyń tý ustaýshysynyń kıimimen salystyryp, «Qazaqstan kıim dızaıny jaǵynan kóptegen elderden áldeqaıda jaqsy eken» deıdi.
Jelide taǵy bir Qytaı azamaty «Meniń anama qazaq sportshylarynyń kıimderi qatty unaıdy. Men de dál sol kıimdi alǵym keledi» dep jazdy. Aıta keterligi, olımpıada komandasyna arnalǵan sport formasyn qazaqstandyq ZIBROO kompanıasy shyǵardy.
Sherýge arnalǵan koleksıany reseılik dızaıner, SHISHKIN brendiniń negizin qalaýshy Dmıtrıı Shıshkın daıyndaǵan. Qazaqstan quramasynyń olımpıadalyq ekıpırovkasyn daıyndaýǵa bir jyldan asa ýaqyt ketti. Kıimdi daıyndaý prosesine atletterdiń ózderi qatysty. Olar formanyń dızaıny, sapasy men fýnksıonalyna qatysty óz usynystaryn bildirgen.