Pavlodar oblysynyń polıseıleri esirtki taratqan degen kúdikpen rep oryndaýshysy men dybys jazý stýdıasynyń prodúserin ustady, dep habarlaıdy almaty-akshamy.kz.
Pavlodar oblystyq polısıa departamentiniń baspasóz qyzmetiniń málimdeýinshe, esirtki qylmysyna qarsy kúres basqarmasynyń qyzmetkerleri tyıym salynǵan zattardy taratqan degen kúdikpen mýzykant pen prodúserdi ustady. Tergeý nusqasy boıynsha, ustalǵandar Pavlodarda qashyqtan esirtki satpaq bolǵan.
Polısıanyń málimetinshe, astanalyq reper men prodúser esirtkini zańsyz ınternet-dúkenniń múddesi úshin taratqan.
"Jedel izdestirý sharalary barysynda 28 jastaǵy reper ustaldy, onyń turǵylyqty jerin tintý kezinde bir orama kannabıs pen uıaly telefon tabyldy. 27 jastaǵy azamatqa tıesili dybys jazý stýdıasyn tintý kezinde ósimdik tektes esirtki zattary, taýardy oraýǵa arnalǵan elektrondy tarazylar men noýtbýk tabyldy", - dedi Pavlodar oblystyq PD bastyǵynyń orynbasary Bolat Nurseıitov.
Ustalǵandarǵa qatysty Qazaqstan Respýblıkasynyń Qylmystyq kodeksiniń 297-babynyń 3-bóligi boıynsha sotqa deıingi tergeý bastaldy. Kúdiktiler qamaýǵa alyndy.