Belgıada ótken búkilálemdik fólklorlyq bı festıvalinde 11 eldiń bıshilerimen birge «Nomad» horeografıa akademıasynyń stýdentteri de óner kórsetti.
8 ben 18 jas aralyǵyndaǵy talanttar kóptiń nazaryna «Qazaq dalasynyń ańyzy» spektaklin usyndy, dep habarlaıdy Almaty-akshamy.kz Qazaqstan.tv-ǵa silteme jasap.
Mahabbat pen meıirimge toly qoıylymda qazaq qyzdarynyń batyrlyǵy, halqymyzdyń salt—dástúri men qonaqjaılylyǵy keńinen kórsetiledi. Syrǵa toly ulttyq aspaptardyń qońyr úni, kózdiń jaýyn alatyn ulttyq kıimder belgıalyqtardy tánti etti. Talantymen tamsantqan sheberlerdiń ónerine kópshilik qoshametti jaýdyrdy.
«Bul ózgeden erek spektákl. Horeografıasy sıqyrly. Horeograf Aınagúl hanymnyń balalarmen keremet jumys istegeni kórinip tur. Jas talanttardyń sahnadaǵy ár qımyly erekshe áser berdi», - deıdi festıvál dırektory Danıel Kýstrı.