«Novaıa volna-2021» festıvaliniń ekinshi baıqaý kúni nesimen este qaldy?
Qazaqstandyq «Mezzo» toby «Novaıa Volna» baıqaýynyń eki kúndik baıqaý nátıjesi boıynsha úshinshi orynda, dep habarlaıdy Almaty-akshamy.kz.
Baıqaý baǵdarlamasy bastalmas buryn ádil qazylar músheleriniń qatysýmen konsert ótti. Belgili ártisterdiń sahnada óner kórsetýi baıqaýǵa qatysýshylar úshin óz aldyna sheberlik saǵaty ispetti boldy. Kóbiniń túrli halyqaralyq baıqaýlarǵa qatysý tájirıbesi bar, sondyqtan da árbir qatysýshy úshin ózderiniń shyǵarmashylyq ómir joldarynda «Novaıa volna» syndy aýqymdy sharalarǵa qatysýdyń mańyzy zor.
Jerlesimiz Dımash Qudaıbergen Igor Krýtoıdyń «Ia skýchaıý po tebe» kompozısıasyn avtordyń súıemeldeýimen oryndady. Ánsúıer qaýym ártistiń oryndaýyn jyly qabyldady, zalda Reseı men ózge de elderdiń Dımashtyń ónerine tabynýshylardyń - Dears qatary qalyń boldy.
Baıqaý barysynda júrgen reporterler qazaqstandyq oryndaýshynyń shyǵarmashylyǵyna qyzyǵýshylyq bildirýshi kórermender kóp ekenin aıtýda. Dımash óziniń barsha tyńdarmandaryna alǵys aıtyp, reseılik áriptesteriniń ónerlerine tánti ekenin bildirdi.
Konsert sońynda ádil qazylar músheleriniń bári «Novaıa volna» baıqaýynyń negizin qalaýshylardyń biri, KSRO halyq ártisi Raımond Paýlsty 85 jyldyq mereıtoıymen quttyqtady.
Kesh baıqaýdyń ekinshi kúnimen jalǵasty. Árbir qatysýshynyń aldynda óz eliniń tanymal áýenin tyńdarman júregine jetkizý mindeti turdy. Án dodasyna Qazaqstan atynan qatysýshy «Mezzo» kvarteti Erık Chantýrıanyń sózine jazylǵan kompozıtor Pavel Esenınniń «Dojd» ánin oryndady. Bul án belgili qazaqstandyq ártis Batyrhan Shúkenovtiń oryndaýynda postkeńestik keńistikte jaqsy tanymal.
Baıqaýdyń ekinshi kúniniń qorytyndysy boıynsha, qazylar alqasy tórt qatysýshynyń ónerin joǵary baǵalap otyr. Olar: ıspanıalyq Horse Gonsales (169 upaı), Qazaqstan namysyn qorǵaýshy «Mezzo» toby (170) upaı, bolgarıalyq oryndaýshy Denısa Karaslavova (173 upaı) jáne armenıalyq ánshi Saro eń joǵary kórsetkish – 179 upaıdy ıelendi.