Otyrys barysynda Ashyq jobasyn odan ári damytý máselelerine erekshe nazar aýdaryldy.
Qazaqstan Premer-Mınıstri Asqar Mamın kásipkerlik máseleleri jónindegi jobalyq keńse otyrysyn ótkizdi, dep habarlaıdy Almaty-akshamy.kz Primeminister.kz saıtyna silteme jasap.
Jeńildikpen nesıe berý baǵdarlamalary monıtorıńiniń nátıjeleri, memlekettik qoldaýdyń qosymsha sharalaryn ázirleý boıynsha bızneske júrgizilgen saýalnamanyń aralyq qorytyndylary, Ashyq jobasyn iske asyrý, mıkroqarjy uıymdary men óńirlerdiń ekonomıkalyq kartasy máseleleri, memlekettik satyp alýlardaǵy, «Samuryq-Qazyna» UÁQ» AQ-nyń jáne jer qoınaýyn paıdalanýshylardyń satyp alýlaryndaǵy jergilikti qamtý máseleleri qaraldy.
BJK-2025 baǵdarlamasyn iske asyrýdyń oń qarqyny baıqalady. Osy jyldyń qańtar-shilde aılarynda 408,3 mlrd teńge somasyna shamamen 14 myń joba sýbsıdıalandy, sýbsıdıalardyń jalpy somasy 47,7 mlrd teńgeni qurady. Sonymen qatar «Damý» qory 170,2 mlrd teńge somasyna 10,9 myń jobaǵa kepildik berdi, kepildikterdiń jalpy somasy 87,4 mlrd teńgeni quraıdy.
Sýbsıdıalaý quralynyń negizgi tutynýshylary – shaǵyn jáne orta bıznes, bul jobalar sany boıynsha 99%-dy jáne jobalar somasy boıynsha 90%-dy quraıdy. Kepildikterdiń negizgi tutynýshylary – saýda jáne óńdeý ónerkásibi salalarynyń kásiporyndary, bul qol qoıylǵan kepildikterdiń jalpy sanynyń 60%-yn jáne olardyń jalpy somasynyń 50%-yn quraıdy.
«Qarapaıym zattar ekonomıkasy» jeńildetilgen nesıeleý baǵdarlamasy boıynsha 774 mlrd teńge somasyna 2996 joba maquldandy, 666 mlrd teńge somasyna 2441 joba sýbsıdıalandy.
Búgingi tańda Qazaqstanda «Bastaý Bıznes» jobasynyń túlekterine nesıe berý úshin 15 mıkroqarjy uıymy (MQU) quryldy. Ótinimderdi qabyldaý osy jyldyń 15 shildesinde bastaldy, osy ýaqytqa deıin shamamen 1,6 myń jańa jumys ornyn qurýmen, jalpy somasy 4,58 mlrd teńgege 797 joba boıynsha ótinimder qabyldandy. Basym baǵyttar boıynsha mal sharýashylyǵy, nan-toqash jáne kondıterlik ónimder óndirisi, saýda salasyndaǵy jobalar kósh bastap tur. Eń kóp ótinim Qaraǵandy (120), Jambyl (100) jáne Shyǵys Qazaqstan (83) oblystarynda berildi.
Jobanyń áleýmettik jáne ekonomıkalyq mańyzdylyǵyn eskere otyryp, Premer-Mınıstr bólingen qarajatty sońǵy qaryz alýshylarǵa tıimdi jetkizý máselesin qysqa merzimde pysyqtaýdy tapsyrdy.
Otyrys barysynda Ashyq jobasyn odan ári damytý máselelerine erekshe nazar aýdaryldy. Qazirgi ýaqytta oǵan qatysýshylardyń sany 111 myńnan asady. Olardyń jartysynan kóbi saýda, tamaqtaný jáne bilim berý salalarynda qyzmet kórsetedi. Karantın talaptaryn buzýshylardy anyqtaý jobaǵa qatysýshylardyń sanyn arttyrý esebinen 15 ese ósti. Bıznes sýbektilerin qamtýdy odan ári ulǵaıtý maqsatynda «Ashyq»-qa qatysýǵa ótinim berý jáne QR-kod alý tártibi jeńildetildi.
Úkimet basshysy Densaýlyq saqtaý mınıstrligine «Atameken» UKP-men birlesip Ashyq jobasyna qatysýshylarǵa demalys kúnderi jumys isteýge múmkindik berý máselesin pysyqtaýdy tapsyrdy. «Atameken» UKP-ǵa ortalyq memlekettik jáne jergilikti atqarýshy organdarmen birlesip, bıznesti Memlekettik qoldaý sharalaryn alýshylardyń biryńǵaı tizilimin qalyptastyrý úshin zańnamaǵa engiziletin qajetti ózgeristerge taldaý júrgizý, sondaı-aq tıisti tásilder men krıterıılerdi daıyndaý tapsyryldy.
«Óńirlerdiń ekonomıkalyq kartasy negizinde Memlekettik qoldaý sharalaryn alýshylardyń biryńǵaı tizilimin qurý bıznesti qoldaý sharalarynyń barlyq spektriniń tıimdiligine monıtorıń júrgizý jáne taldaý sapasyn arttyrýǵa múmkindik beredi», - dedi Acqar Mamın.
Otyrys barysynda «Atameken» UKP basqarma tóraǵasy Abylaı Myrzahmetov eń kóp zardap shekken salalardyń qazirgi jaǵdaıy jáne ekonomıkanyń óndiristik sektorlaryn damytý perspektıvalary boıynsha Qazaqstannyń 10 myńnan astam kásipkerlerine júrgizilgen saýalnamanyń aralyq qorytyndysyn usyndy.
Úkimet basshysy «Atameken» UKP júrgizgen saýalnamanyń túpkilikti qorytyndysyn egjeı-tegjeıli zerdeleýdi jáne bıznesti odan ári qoldaý boıynsha qosymsha sharalar daıyndaýdy tapsyrdy.
Ortalyq memlekettik jáne jergilikti atqarýshy organdarǵa, sondaı-aq kvazımemlekettik uıymdarǵa retteletin satyp alýlardaǵy jergilikti qamtýdy baqylaýdy qamtamasyz etý, otandyq óndirýshilerdiń memlekettik satyp alýǵa qoljetimdiligin odan ári qamtamasyz etý jóninde sharalar qabyldaý tapsyryldy.