Olar muqtaj ata-analarǵa balalaryn mektepke daıyndaýǵa kómektesti.
«Qaıyrymdy ister marafony» jalpyulttyq jobasy jalǵasyn taýyp, qazaqstandyq mesenattar muqtaj ata-analarǵa kómektesti, dep habarlaıdy Almaty-akshamy.kz.
Mesenattar kóp balaly jáne az qamtylǵan otbasy balalaryna mektepke kerek qural-jabdyq, kıim-keshek alyp bergen. Sharany uıymdastyrýshylardyń aıtýynsha, júzden astam bala shamamen 1 mln teńge somada ataýly kómek aldy.
«Aksıanyń maqsaty barlyq qajetti zattardy – kıim-keshekti, rúkzakty, keńse taýarlaryn jáne basqa qajettilikterge belgili bir somany jınaý jáne ony jaǵdaıy qıyn, turmystyq jaǵdaıy tómen otbasynda ósip jatqan balalarǵa usyný boldy. Bıylǵy jyly balalarǵa arnalǵan jańa oqý jyly offlaın rejımde ótedi, sondyqtan áleýmettik sebepter boıynsha balalardyń mektepke kelmeýiniń aldyn alý maqsatynda biz kúzgi jaqsylyq kúnin merekeleý aıasynda aksıaǵa bastamashy boldyq», - dedi Qazaqstannyń isker áıelder qaýymdastyǵynyń prezıdenti Raýshan Sársembaeva.
«Qaıyrymdy ister marafony» jalpyulttyq jobasy osy jyldyń aqpan aıynda Memleket basshysy Qasym-Jomart Toqaevtyń bastamasymen Qazaqstan Táýelsizdiginiń 30 jyldyǵyn merekeleý aıasynda bastalǵan bolatyn. Joba QR Aqparat jáne qoǵamdyq damý mınıstrliginiń jáne Azamattyq bastamalardy qoldaý ortalyǵynyń muryndyq bolýymen júzege asyrylýda.
