800-den astam muǵalim ótinish bergeni belgili boldy.
Elimizde kadr tapshylyǵy bar óńirlerge úzdik muǵalimderdi tartýǵa arnalǵan arnaıy baǵdarlamaǵa qatysý úshin qujat qabyldaý júrip jatyr, dep habarlaıdy Almaty-akshamy.kz.
«Alǵashqy aptada 800-den astam muǵalim ótinish bergen. Memleket basshysynyń tapsyrmasy boıynsha Oqý-aǵartý mınıstrligi muǵalimder tapshylyǵy nemese bilim sapasy nashar óńirlerge úzdik muǵalimderdi tartý úshin arnaıy baǵdarlama ázirlegen bolatyn»,- delingen Oqý-aǵartý mınıstrliginiń baspasóz qyzmetiniń habarlamasynda.
Mundaı másele Túrkistan, Atyraý, Mańǵystaý jáne Almaty oblystarynda baıqalady. Bul óńirlerde matematıka, fızıka, hımıa, orys tili men ádebıeti, shet tili muǵalimderi tapshy. Úzdik pedagogterdi tartýǵa arnalǵan arnaıy baǵdarlamada muǵalimderdi qoldaýǵa baǵyttalǵan sharalar kesheni bar.
Atap aıtqanda, laýazymdyq jalaqynyń 250% mólsherinde yntalandyrý tólemderi, onyń ishinde jalaqyny kóterý, turǵyn úıdi jaldaý aqysyn jáne komýnaldyq tólemder shyǵynyn óteý qarastyrylǵan.
«Arnaıy baǵdarlamaǵa qatysý úshin qujattar 2022 jylǵy 21 shildege deıin qabyldanady. Alǵashqy aptada pedagogterden 800-den astam ótinish tústi. Qajetti qujattar tizimi jergilikti atqarýshy organdardyń jáne NZM aqparattyq resýrstarynda ornalastyrylǵan. Jalaqyǵa qosylǵan ústemeaqyǵa jaldamaly turǵyn úı men komýnaldyq tólemderdi óteý kiredi. Sondaı-aq arnaıy baǵdarlama boıynsha tórt oblystyń birine qonys aýdarǵan pedagogtiń balalaryna balabaqsha men orta mektepterden oryn beriledi. Sondaı-aq konkýrstan ótken muǵalimdermen 5 jylǵa eńbek sharty jasalady», dep atap ótti QR Oqý-aǵartý mınıstrligi Mektepke deıingi jáne orta bilim komıtetiniń tóraǵasy Gúlmıra Kárimova.
Baıqaýǵa qatysý úshin ótinishti oblystyń bilim basqarmasyna berýge bolady. Konkýrsqa tıisti beıinder boıynsha joǵary pedagogıkalyq, joǵary kásiptik bilimi bar, «pedagog-sarapshy», «pedagog-zertteýshi», «pedagog-sheber» biliktilik sanattary bar muǵalimder, sondaı-aq oqý úlgerimi jaqsy joǵary oqý oryndarynyń pedagogıka mamandyqtarynyń túlekteri qatysa alady.
Konkýrs eki kezeńnen turady: kompúterlik testileý jáne esse jazý, sonymen qatar áńgimelesý.
Testileý men esse jazý úmitkerdiń tańdaýy boıynsha kompúter formatynda qazaq, orys nemese aǵylshyn tilderinde ótedi. Ol elimizdiń 17 aımaǵyndaǵy NZM bazasynda júzege asyrylady. Negizgi pán boıynsha test 25 tapsyrmadan turady, al esse kólemi 350 sóz.
Qujattardy qabyldaý týraly qosymsha aqparatty óńirlerdegi Call-ortalyq mamandary men Mektepke deıingi jáne orta bilim komıtetiniń saıtynan alýǵa bolady.