Búkil stansany bir el ǵana salmaıdy
«Samuryq-Qazyna» UÁQ» AQ Basqarma tóraǵasy Almasadam Sátqalıev Qazaqstanda salynatyn atom elektr stansasyna qandaı tehnologıalar qarastyrylyp jatqanyn aıtty, dep habarlaıdy Almaty-akshamy.kz QazAqparatqa silteme jasap.
«2030 jylǵa qaraı Qazaqstanda iri energıa kózin salý qajet ekenin túsinemiz. Qazirdiń ózinde Úkimet qurylys alańyn anyqtaýǵa jaqyn. Qurylys alańy resmı túrde anyqtalǵannan keıin qurylystyń «vendoryn» anyqtaý rásimi aıaqtalady. Sarapshylar toby Túrkıa, Vengrıa, Fransıa, Ońtústik Koreıa, Qytaıda jumys istep turǵan jáne salynyp jatqan alańdarǵa baryp, jasaǵan úlken jumysyna súıenemiz», - dedi Almasadam Sátqalıev Aqordada BAQ ókilderiniń saýalyna oraı.
Onyń atap ótýinshe, qurylys barysynda birneshe el tájirıbelerin bólisetin bolady.
«Bizdiń osy alańdardy aralaý barysynda qurylysty halyqaralyq konsorsıým túrinde júzege asyrý kerek ekenin anyqtadyq. Iaǵnı, búkil stansany bir el ǵana salmaıdy. Biz eń jaqsy tehnologıany alamyz. Eger ıadrolyq aral týraly aıtatyn bolsaq, Reseı, Koreıa, Fransıa eń tıimdi tehnologıany usyna alady. Eger energetıkalyq jabdyqtar týraly aıtatyn bolsaq, onda elektr energıasyn óndirýmen baılanysty «General electric» jáne koreı óndirýshileriniń eń jaqsy tehnologıalaryn kórip otyrmyz. Eger biz óte mańyzdy bóligin, ıaǵnı kómekshi jabdyqtar - avtomatıka, esepke alý júıeleri, sorǵy jabdyqtary týraly aıtar bolsaq, onda kóptegen óndirýshi bar. Olar negizinen Fransıa, Germanıa syndy Eýropa elderinde shoǵarylanǵan», - dedi ol.
Aıta keteıik, qazirgi ýaqytta Aqordada Memleket basshysy Qasym-Jomart Toqaev pen Túrikmenstan Prezıdenti Serdar Berdymuhamedov kezdesý ótkizip jatyr.