Qyzyl kitapqa arnalǵan ýeb-portal qurylady.
Qazaqstannyń Premer-Mınıstriniń birinshi orynbasary Roman Sklár Májilis depýtattarynyń saýalyna bergen jaýabynda eldegi sırek kezdesetin jáne quryp bara jatqan janýarlardy saqtaý jónindegi Úkimet jospary týraly málimet berdi, dep habarlaıdy Almaty-akshamy.kz QazAqparatqa silteme jasap.
«Sırek kezdesetin jáne quryp bara jatqan janýarlar tiziminiń memlekettik ǵylymı-tehnıkalyq negizdemesi Qazaqstandaǵy bıologıalyq resrýrstardy tıimdi basqarýǵa jaǵdaı týǵyzady»,- dep jazady Roman Sklár.
Onyń aıtýynsha, omyrtqaly jáne omyrtqasyz janýarlardyń sırek kezdesetin túrleriniń jaǵdaıyna baǵa berý úshin ǵylymı-tehnıkalyq baǵdarlama ázirlengen. Ony Ǵylym jáne joǵary bilim mınıstrligi arqyly qarjylandyrý kózdelip otyr.
«Joǵary ǵylymı-tehnıkalyq keńes maquldaǵan jaǵdaıda bul baǵdarlama aıasynda Qazaqstannyń Qyzyl kitabyna revızıa jasalady. Sonyń negizinde mazmuny jańartylyp, Qyzyl kitapqa arnalǵan ýeb-portal qurylady. Ol portalda sırek kezdesetin jáne quryp bara jatqan janýarlar týraly málimet tolyqqandy beriledi. Atalǵan sharalardyń bárin iske asyrý úshin qoldanystaǵy zańnamaǵa ańshylyq jáne janýarlardy saqtaý jóninde tıisti ózgerister engiziledi», - dep jazylǵan jaýapta.