10 mıllıonnan astam qazaqstandyq vaksına saldyrǵan.
Densaýlyq saqtaý mınıstri Ajar Ǵınıat Qazaqstanda koronavırýstyń taralýyna qatysty shekteý engizý jospary týraly suraqqa jaýap berdi, dep habarlaıdy Almaty-akshamy.kz QazAqparatqa silteme jasap.
«Kovıd shekteýleri týraly aıtatyn bolsaq, Qytaıdaǵy qazirgi jaǵdaı múldem basqasha. Pandemıa bastalǵannan beri Qytaıda óte qatań shekteý sharalary qabyldandy. Osy oraıda, olar ınfeksıany oqshaýlaýǵa qatysty shekteý is-sharalaryna erekshe mán berdi. Qazir Qytaıdaǵy ujymdyq ımýnıtet qandaı deńgeıde ekenin aıta almaımyn. Olarda aýrý shyqqan jerlerde shekteý is-sharalary qabyldanady. Buǵan halyq óz narazylyǵyn bildirip jatqan bolar», - dedi A. Ǵınıat Senattaǵy Úkimet saǵatynan keıin tilshiler saýalyna jaýap bere otyryp.
«Elimizde 10 mıllıonnan astam adam vaksına saldyrǵanyn, bes mıllıonnan astam adamǵa qaıta vaksınasıalaý júrgizilgenin, ujymdyq ımýnıtet qalyptasqanyn, sondaı-aq "omıkrondy" adamdar jeńil eńserip jatqanyn eskere otyryp, el aýmaǵynda shekteý is-sharalaryn engizý josparlanbaǵan», - dedi mınıstr.
Buǵan deıin habarlanǵandaı, Densaýlyq saqtaý mınıstri Qazaqstanda anyqtalǵan koronavırýstyń «serber» shtamynyń erekshelikterin aıtty.