Elimizde jol qurylysyna ekologıalyq turǵydan tıimdi sheshimderdi engizý baǵytynda jańa ǵylymı joba bastaldy.
Eskirgen asfáltty qaıta qalpyna keltirip, ony jol jabyndarynyń joǵarǵy qabattarynda qaıta paıdalanýǵa múmkindik beretin ınovasıalyq tehnologıany jasaýǵa kiristi, - dep habarlaıdy Aqshamnews.kz.
Mamandardyń aıtýynsha, bul zertteý jumysy quramynda asfáltbetondy jasartatyn jańa qospa daıyndaýǵa baǵyttalǵan. Mundaı tehnologıa qurylys qaldyqtarynyń kólemin azaıtyp, energıa shyǵynyn tómendetýge jáne kómirqyshqyl gazynyń shyǵaryndylaryn qysqartýǵa yqpal etedi.
Bizdiń maqsat - jańa materıal óndirýden góri qolda bar resýrstardy tıimdi paıdalaný. Bul qorshaǵan ortaǵa túsetin salmaqty azaıtyp qana qoımaı, jol salasyn ekologıalyq jáne tehnologıalyq turǵyda jańa deńgeıge shyǵarady, - deıdi QazjolǴZI jol-qurylys materıaldary jáne jańa tehnologıalar bóliminiń basshysy Saltanat Áshimova.
Joba 2025-2027 jyldarǵa arnalǵan ǵylymı-tehnıkalyq baǵdarlamalar sheńberinde júzege asyrylyp jatyr. Ǵalymdar jańa jasartqysh qospany Qazaqstannyń klımattyq erekshelikterine beıimdeýdi kózdeıdi. Nátıjesinde, jol jamylǵylarynyń sapasy men uzaqmerzimdiligi artyp, salanyń aınalmaly ekonomıka qaǵıdattaryna kóshýi kúsheıedi dep kútilýde.