Jıhaz óndirisi qarqyndy damyp keledi.
Keler jyly Qazaqstanda jıhaz óndirisi boıynsha 4 iri joba iske qosylady. Búginde kásiporyndar qurylys-montaj jumystaryn júrgizip, óndiris oshaǵyna qajetti jabdyqtardy satyp alýda, dep habarlaıdy Almaty-akshamy.kz.
Indýstrıa jáne ınfraqurylymdyq damý mınıstrliginiń baspasóz qyzmetiniń málimeti boıynsha, jalpy, 2025 jylǵa deıin jıhaz jáne aǵash óńdeý ónerkásibinde 12 jobany iske asyrý josparlanǵan.
2022 jyldyń birinshi toqsanynyń qorytyndysy boıynsha jıhaz ónimderiniń óndiris kólemi 16,4 mlrd teńgeni quraǵan. Atap aıtqanda, qańqasy metaldan jasalǵan otyrýǵa arnalǵan jıhaz óndirisi 6%-ǵa, keńsege arnalǵan aǵashtan jasalǵan jıhaz 30,4%-ǵa, as úı jıhazy 33,5%-ǵa, sondaı-aq jatyn bólmege arnalǵan aǵashtan jasalǵan jıhazdar óndirisi 2,2%-ǵa artqan.
«Búginde Qazaqstanda jıhaz óndirisi qarqyndy damyp keledi. Salada jańa kásiporyndar ashylyp, óndiris oshaqtarynyń otandyq naryqtaǵy básekege qabilettiligi artýda. Jalpy, elimizde turǵyn úı qurylysy jyldan jylǵa belsendi júrgizilýine baılanysty jıhaz ónimderine degen suranys ta joǵary bolyp otyr», – deıdi sala mamandary.
Aıta keterligi, otandyq jıhaz ónerkásibiniń ónimderi kórshi elderde de úlken suranysqa ıe. Jyl basynan beri jıhaz ónimderi eksportynyń negizgi kólemi Qyrǵyzstan, Ózbekstan, Germanıaǵa jóneltilgen. Suranysqa ıe taýarlardyń qatarynda plasmassa men metaldan jasalǵan jáne jatyn bólmege arnalǵan aǵashtan daıyndalǵan jıhaz syndy taýarlar bar.