Mınıstrlik shaǵyn kásipkerlik sýbektilerin, onyń ishinde mıkrokásipkerlik sýbektilerin barý arqyly tekserýdi kózdep otyr.
Aýyl sharýashylyǵy mınıstrligi jer zańnamasynyń saqtalýyna bıznesti tekserýge múmkindik beretin jarlyq jobasyn jarıalady, dep habarlaıdy Almaty-akshamy.kz
Prezıdenttiń 2019 jylǵy 26 jeltoqsandaǵy «Qazaqstan Respýblıkasynda tekserýlerge jáne profılaktıkalyq baqylaý men qadaǵalaýdy baryp júrgizýge moratorıı engizý týraly» Jarlyǵyna tolyqtyrý engizý josparlanyp otyr.
Dálirek aıtqanda, qujat «Qazaqstan Respýblıkasynyń jer zańnamasynyń saqtalýyna tekserýler jáne profılaktıkalyq baqylaýdy baryp júrgizý» tarmaǵymen tolyqtyrylady.
Túsindirme jazbada aıtylǵandaı, 2021 jylǵy 26 shildede Aýyl sharýashylyǵy mınıstrligi jarlyq qoldanylǵan kezeńde aýyl sharýashylyǵy jerlerin paıdalanbaý ne tıimsiz paıdalaný máseleleri boıynsha tekserister júrgizý múmkindigi úshin «jappaı qaýip» uǵymyn aıqyndaý jóninde usynymdar bekitti.
Alaıda, «jappaı qaýip» aıasynda tekseris júrgizý kezinde jergilikti jerlerde birqatar másele týyndaıdy. Olar qoldanystaǵy jarlyq boıynsha tekseriske tyıym salynǵanyn alǵa tartady.
Osyǵan baılanysty jarlyqqa bıznesti tekserýge múmkindik beretin túzetý engizý josparlanyp otyr.
Joba «Ashyq NQA» portalynda 24 maýsymǵa deıin qoǵam talqysyna shyǵaryldy.