Qazaqstanda 2025 jyldyń basynan beri esirtki tasymalynyń 111 jetkizý arnasy joıylyp, 21 narkozerthana áshkerelendi, dep habarlaıdy Aqshamnews.kz Bas prokýratýraǵa silteme jasap.
2025 jyldyń basynan beri elimizde esirtkiniń zańsyz aınalymyna qarsy kúres kúsheıe tústi. Basprokýratýranyń habarlaýynsha, osy ýaqyt aralyǵynda quqyq qorǵaý jáne arnaıy organdardyń úılesimdi jumysynyń nátıjesinde 111 esirtki tasymaly arnasy joıylyp, 21 narkozerthananyń qyzmeti toqtatylǵan. Sonymen qatar, quramynda esirtkisi bar ósimdikterdi zańsyz ósirýdiń 125 faktisi anyqtaldy.
Basprokýratýranyń dereginshe, bul baǵytta arnaıy prokýrorlar aıtarlyqtaı jumys atqarǵan. Olar Mańǵystaý, Ulytaý oblystary men Almaty, Shymkent qalalarynda ınternet arqyly esirtki taratqan narkodúkenderdiń uıymdastyrýshylaryn áshkerelep, isterdi sapaly tergegen.
9 tonna esirtki men 12 tonna prekýrsor tárkilendi
Jyl basynan beri tárkilengen esirtki kólemi – 9 tonna, onyń ishinde 254 kılogramy sıntetıkalyq zattar. Sondaı-aq, 12 tonna prekýrsor (esirtki jasaýǵa qoldanylatyn hımıalyq zattar) tárkilendi. Esirtki kontrabandasy derekteri byltyrǵy kezeńmen salystyrǵanda 56 paıyzǵa azaıyp, 182 jaǵdaıdan 80-ge deıin túsken.
Internet-dúkenderge qarsy jańa tásilder: esepshottar buǵattalyp jatyr
Esirtki satýmen kúreste qarjylyq tizbekterdi anyqtaýǵa da basymdyq berilip jatyr. Bas prokýratýranyń bastamasymen ınternet-dúkendermen baılanysty bank shottaryn anyqtaý, buǵattaý jáne arestke qoıý algorıtmi engizilgen. Nátıjesinde 98 myńnan astam bank shoty buǵattalyp, olardyń ishindegi qarajat kólemi 2,3 mıllıard teńgeden asqan.
Qylmystyq ister sheńberinde qarjylyq tergeýler jalǵasyp jatyr. Maqsat – esirtki satýdan túsken tabystyń qaıdan shyqqanyn, túpki ıelerin jáne óz shottaryn "dropperlik" operasıalarǵa paıdalanýǵa bergen azamattardy anyqtaý.
Sonymen qatar, "Kıbernadzor" júıesi arqyly ınternettegi zańsyz esirtki satatyn 6 myńnan astam saıttyń qyzmeti toqtatylǵan.