Internet pen telefon arqyly alaıaqtyq kóbeıýine baılanysty jalǵan nómirler buǵattalady.
Bul týraly Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın áleýmettik jelidegi paraqshasynda jazdy, dep habarlaıdy Almaty-akshamy.kz.
Baǵdat Mýsın ishki ister mınıstri Marat Ahmetjanovpen birlese ótken keńeste ınternet-alaıaqtyqqa qarsy is-qımyl máselelerin talqylaǵanyn málimdedi.
«Biz qazirgi ýaqytta baılanys operatorlarymen birge osy máselege qatysty birlesken is-sharalardy júzege asyrýdamyz. Búgingi tańda alaıaqtarmen kúresýdiń tıimdi ádisteriniń biri - jalǵan nómirlerdi buǵattaý. Qyrkúıek aıynyń sońyna deıin baılanys operatorlary alaıaqtar qońyraý shalatyn jalǵan telefon nómirlerin anyqtap, buǵattaıtyn bolady. Sıfrlyq damý mınıstrligi azamattardyń qaýipsizdigin eskere otyryp, uıaly nómirlerdi tirkeý kezinde bıometrıalyq sáıkestendirý júıesin engizýdi qarastyrýda. Osylaısha, biz telefon nómirleriniń bóten adamdarǵa tirkelý jaǵdaılarynyń aldyn alǵymyz keledi», - dedi Baǵdat Mýsın.
Sonymen qosa, vedomstvo ınternet-alaıaqtyqqa qarsy aqparattyq-túsindirý baǵytynda banktermen tyǵyz áreket jasaýdy usynady.
«Óıtkeni alaıaqtyq faktilerdiń oryn alýy kóp jaǵdaıda bank operasıalarymen tikeleı baılanysty. Bank qyzmetkerleri turǵyndarǵa habarlasqan ýaqytta, onyń shynymende bankten habarlasyp turǵanyna kóz jetkizý úshin SMS-habarlamalar arqyly sáıkestendirý júıesin engizýge bolady», - dedi mınıstr.