Kógildir otynnyń bólshek saýda baǵasy bir jylda 5 paıyzǵa qymbattaǵan.
2022 jyldyń qańtar-aqpan aılarynda Qazaqstanda 10 mlrd tekshe metr tabıǵı gaz óndirildi, bul bir jyl burynǵydan 9,2%-ǵa artyq, dep habarlaıdy Almaty-akshamy.kz Energyprom.kz saıtyna silteme jasap.
Sonyń ishinde gaz kúıindegi ónim 4 mlrd tekshe metrdi qurady, ilespe munaı 6 mlrd tekshe metr boldy.
Óndirilgen gazdyń quny 52,2 mlrd teńgeni qurady (ónerkásiptik óndiris ındeksi – 108,9%).
Óndiristiń basym bóligi, árıne, Atyraý oblysynyń úlesine tıdi: 4,6 mlrd tekshe metr, jyldyq ósimi – 18,3%-ǵa artyq. Úzdik úshtikke ádettegideı Batys Qazaqstan (3,7 mlrd tekshe metr) jáne Aqtóbe (1 mlrd tekshe metr) oblystary da kiredi.
Anyqtama úshin: jalpy 2021 jyldyń qańtar-jeltoqsan aılarynda elimizde 54,3 mlrd tekshe metr tabıǵı gaz óndirilgen, bul bir jyl burynǵydan 1,5%-ǵa az.
Tabıǵı gazdy tikeleı komersıalyq baǵyttaǵy óndirýge keletin bolsaq, 2022 jylǵy qańtarda qazaqstandyq kompanıalar naryqtyq suranysty (ishki naryqtaǵy satý men eksportty qosa alǵanda) 54,3%-ǵa qamtamasyz etti, bul kórsetkish bir jyl buryn 46,4% bolǵan. Importtyń úlesi tıisinshe 45,7%-dy qurady. Elimizge 902,2 mln tekshe metr gaz ákelindi, bul kórsetkish 2021 jyldyń qańtarymen salystyrǵanda 30,8%-ǵa az.
Bul rette eksporttyń úlesi 45,2%-dy qurady. Qazaqstan 891,6 mln tekshe metr tabıǵı gaz eksporttady. Qazaqstan qańtarda gazdy tek Reseıge ǵana tasymaldaǵan. Eske sala ketsek, Qazaqstan men Reseıdiń ınfraqurylym máselelerine qatysty gaz salasynda aıyrbas operasıalarynyń birqatar sqemalary bar.
2022 jyldyń qańtarynda ishki naryqtaǵy satý kólemi 38,3%-ǵa azaıyp, 1,1 mlrd tekshe metrdi qurady.
Qazaqstan Respýblıkasynyń ishki naryǵynda aǵymdaǵy jyldyń aqpan aıynyń qorytyndysy boıynsha gazdyń tutyný baǵasy bir jylda 5,4%-ǵa qymbattaǵan.
Baǵanyń ósýi elimizdiń 17 óńiriniń 14-inde baıqaldy. Shyǵys Qazaqstan oblysynyń turǵyndary baǵanyń qymbattaýyn qatty sezindi, óńirde baǵa bir jylda 14%-ǵa ósken. Qymbat úshtikke Mańǵystaý (12%- ǵa ósken) jáne Soltústik Qazaqstan (11,7%- ǵa ósken) oblystary da kirdi. Eń az jyldyq ósim elordada tirkeldi – 0,7%. Gaz baǵasy úsh aımaqta: Shymkent, Qyzylorda (ár oblysta 2%-ǵa) jáne Túrkistan (4,4%-ǵa) oblystarynda arzandaǵan.
