2025 jyldyń sáýir aıynan bastap Qazaqstan Respýblıkasy Oqý-aǵartý mınıstrligine qarasty «Daryn» respýblıkalyq ǵylymı-praktıkalyq ortalyǵy daryndy oqýshylar men pedagogterdi qoldaý maqsatynda SMART Daryn ulttyq sıfrlyq platformasyn iske qosady, dep habarlaıdy aqshamnews.kz.
Bul sıfrlyq joba respýblıkalyq jáne halyqaralyq saıystarǵa oqýshylardy daıyndaýdyń mańyzdy quralyna aınalyp, onlaın-bilim alý men tájirıbeli trenerlermen keńesý múmkindigin usynyp, oqýshylarǵa bilimderin jetildirýge jáne ıntellektýaldyq baıqaýlarǵa daıyndyqtaryn arttyrýǵa kómektesedi.
Birinshi kezeńde proktorıng júıesin qoldanyp onlaın-olımpıadalar men konkýrstar ótkizý josparlanyp otyr. Aldaǵy ýaqytta onlaın-sabaqtar uıymdastyrylatyn bolady.
«Platforma daryndy oqýshylardyń damýyna jáne pedagogterdiń biliktiligin arttyrýǵa jańa múmkindikter ashyp, oqý prosesine zamanaýı bilim berý tehnologıalaryn engizýge yqpal etedi. Biz SMART Daryn jobasy daryndy oqýshylar úshin sapaly bilim alýdy aıtarlyqtaı jeńildetip, bilim berý júıesiniń barlyq qatysýshylary arasynda tıimdi ózara árekettestik ornatatynyna senimdimiz», — deıdi «Daryn» RǴPO dırektory Ǵajdembek Tursynov.
Sonymen qatar platformada daryndy balalarǵa arnalǵan mamandandyrylǵan bilim berý uıymdaryna túsý úshin emtıhandar ótkizý josparlanǵan. Qazirgi tańda Qazaqstanda 130-dan astam mamandandyrylǵan mektep bar.
Sondaı-aq SMART Daryn pedagogter úshin ádistemelik materıaldar men keńesterden turatyn onlaın-kitaphana usynatyn bolady.