Endi Qazaqstandaǵy áskerı joǵary oqý oryndaryna eGov.kz portaly arqyly onlaın oqýǵa túsýge bolady, dep habarlaıdy aqshamnews.kz "Ulttyq aqparattyq tehnologıalar" AQ-ǵa silteme jasap.
"eGov.kz portaly Qazaqstan Respýblıkasy Qorǵanys mınıstrliginiń áskerı oqý oryndaryna túsýge úmitker retinde ótinish berý qyzmetin usynady. Bul proses tolyǵymen elektrondy túrde, onyń ishinde ótinish berý jáne nátıjeni "Jeke kabınette" alý bar. Júıe qabyldaýdaǵy shekteýlerdi (medısınalyq derekter, sozylmaly aýrýlar jáne ótken ınfeksıalar negizinde) tekseredi, sondaı-aq sottylyqty tekserýge suranys jiberedi. Eger adamnyń sottylyǵy bolmasa, jaýap 10 mınýt ishinde keledi. Odan keıin Qazaqstan Respýblıkasy Ulttyq qaýipsizdik komıtetiniń arnaıy tekserýinen ótý úshin anketany toltyrý qajet", dedi "UAT" AQ baspasóz qyzmeti
Úmitkerlerge aldyn ala № 075 nysanyn alý jáne Qazaqstan Respýblıkasy Ulttyq qaýipsizdik komıtetinde tekserý úshin ómirbaıanyn daıyndaý usynylady.
Kóptegen derekter (mekenjaı, foto, týystary týraly aqparat) memlekettik júıelerden avtomatty túrde júkteledi, qalǵanyn qolmen tirkeýge bolady.
Ótinish berý úshin:
eGov.kz portalyna kirip, "Azamattar" – "Áskerı esepke alý jáne qaýipsizdik" – "Áskerı qyzmet" bólimine ótińiz.
"Qazaqstan Respýblıkasy Qorǵanys mınıstrliginiń áskerı oqý oryndaryna túsýge úmitker retinde oqýǵa qabyldaý" qyzmetin tańdap, "Qyzmetke onlaın tapsyrys berý" túımesin basyńyz.
Qajetti aqparatty toltyryp, ótinimge qol qoıyńyz.
Nátıje "Qyzmet kórsetý tarıhy" bólimindegi "Jeke kabınette" qoljetimdi bolady.
"Ushý mamandyqtary boıynsha emtıhan bastalǵanǵa deıin 30 kúnnen keshiktirilmeı alynǵan medısınalyq qorytyndy qajet. Nátıjesi (tirkeý nemese sebebi kórsetile otyryp, bas tartý) "Jeke kabınetke" jiberiledi. Qyzmet kórsetý merzimi 200 kúnge deıin. Qujattardyń tolyq tizimi men egjeı-tegjeıli nusqaýlar eGov.kz saıtynda.", delingen"UAT" AQ baspasóz qyzmeti taratqan aqparatta.