AES salý jobasy halyqtyń pikirin eskere otyryp qana qabyldanýy múmkin.
QR Energetıka mınıstri Bolat Aqsholaqov Ortalyq komýnıkasıalar qyzmetinde ótken brıfıńte atom elektr stanasyn salý jobasy týraly pikir bildirdi, dep habarlaıdy Almaty-akshamy.kz QazAqparatqa silteme jasap.
«Jýyqta reseılik «Rosatom» memlekettik korporasıasynyń bas dırektory Alekseı Lıhachev qańtar oqıǵalary óz kompanıasynyń Qazaqstanmen atom elektr stansasyn salý jónindegi áriptestigine áser etpeıtinin málimdedi. Bul joba qazir qandaı satyda ekenin, AES qurylysy boıynsha sońǵy kelisimder týraly aıtyńyzshy», - dep surady BAQ ókili Energetıka mınıstrinen.
«Shyn máninde bul oqıǵalardyń arasynda eshqandaı baılanystyń bolýy da múmkin emes. Ekeýi eki túrli másele negizi. Atom stansasyn salý - óte názik másele. Sondyqtan «salamyz ba álde salmaımyz ba» degen suraq boıynsha ázirge eshqandaı sheshim joq», - dep túsindirdi Bolat Aqsholaqov.
Sondaı-aq, ol AES salý jobasy halyqtyń pikirin eskere otyryp qana qabyldanýy múmkin ekenin basa aıtty. «Bul da qarastyrylýy múmkin. Biraq taǵy da aıtaıyn, bul óte názik másele jáne tyńǵylyqty zerdeleýdi qajet etedi. Ol zertteýge birinshi kezekte qoǵamdy tartý kerek. Ázirge Qazaqstannyń qandaı da bir ýchaskesinde stansıa salý jóninde aıqyn sheshim joq», - dedi mınıstr.