Keńesti premer-mınıstr basqaratyn bolady.
Sý máselesi boıynsha ótetin memleketaralyq kelissózderde Qazaqstannyń múddesin tabandy qorǵaýǵa negizdelgen Sý keńesi qurylady. Ekologıa, geologıa jáne tabıǵı resýrstar mınıstrligi osyndaı bastama kóterip otyr, dep habarlaıdy Almaty-akshamy.kz QazAqparatqa silteme jasap.
Vıse-mınıstr Serik Qojanıazov Ortalyq komýnıkasıalar qyzmetinde ótken brıfıńte atalmysh keńesti QR Premer-Mınıstri basqaratynyn málim etti. Onyń aıtýynsha, vedomstvo sý resýrstary salasyndaǵy ahýaldy jaqsartý úshin birneshe sharany josparlap otyr.
«Birinshi, memleketaralyq ózara qarym-qatynastardyń asa mańyzdy máseleleri boıynsha sheshimder ázirleý úshin kelissózder prosesterindegi Qazaqstannyń ustanymyn kúsheıtý úshin QR Premer-Mınıstriniń basshylyǵymen sý keńesi qurylmaqshy. Bul keńestiń negizgi mindeti syrtqy sý saıasatyn ázirleý barysynda Úkimettiń barlyq quramynyń is-qımylyn úılestirý bolady», - dedi mınıstrdiń orynbasary.
Sondaı-aq, mınıstrlik sý resýrstary komıteti men onyń baseındik ınspeksıalaryn kúsheıtýge jol ashpaqshy.
«Sý resýrstaryn basqarýdyń qoldanystaǵy júıesi birinshi kezekte sý sharýashylyǵy qurylystaryn qaıta jańartý jáne salý jónindegi jobalardy iske asyrýǵa baǵyttalǵan. Sý resýrstaryn esepke alý, sý únemdeý, taldaý jáne jaǵdaıdyń damýyn boljaý sıaqty máseleler tıisti nazardan tys qalyp keledi. Baseındik ınspeksıalardy sý resýrstaryn memlekettik basqarýdyń negizi retinde qaraý qajet», - dedi ol.
Aıtýynsha, ınspektorǵa túsetin júkteme tym aýyr.
«Búginde baseındik ınspeksıanyń bir qyzmetkeri 93 aýyldyq eldi meken ornalasqan 41 myń sharshy qashyrym aýmaqqa qyzmet kórsetedi. Baseındik ınspeksıalardy materıaldyq-tehnıkalyq qamtamasyz etý deńgeıi ózekti bolyp tabylady», - dedi Serik Qojanıazov.