Ázerbaıjannyń Baký qalasynda SOR29 konferensıasy aıasynda týrızmdegi klımattyq sharalardy keńeıtýge arnalǵan kezdesý ótti.
Jıyn barysynda Qazaqstan turaqty týrızm salasyndaǵy jetistikteri men bolashaq josparlaryn tanystyrdy, dep habarlaıdy aqshamnews.kz.
İs-sharaǵa QR Týrızm jáne sport mınıstriniń orynbasary Erjan Erkinbaev, Dúnıejúzilik týrısik uıymnyń Bas hatshysy Zýrab Pololıkashvılı, Ázirbaıjan Respýblıkasynyń Memlekettik týrızm agenttiginiń tóraǵasy Fýad Naǵıev, sondaı-aq 20-dan astam eldiń jáne halyqaralyq uıymdardyń ókilderi qatysty.
«Qazaqstanda ulttyq parkter men qoryqtar quramynda qorǵalatyn biregeı tabıǵı ekojúıeler bar. Bizdiń mindetimiz – qorshaǵan ortaǵa zıan keltirmesten ekonomıkalyq damýdy qamtamasyz etý. Biz týrızm salasynda kómirqyshqyl kólemin azaıtýǵa jáne ekologıalyq jaýapkershilikti arttyrýǵa múmkindik beretin «Jasyl standarttardy» engizýdi jalǵastyramyz», – dedi Erjan Erkinbaev.
Kezdesý barysynda týrızm salasyndaǵy klımattyq áreketterdi kúsheıtýge baǵyttalǵan Baký deklarasıasynyń negizgi baǵyttary talqylandy. Qazaqstan týrızmniń klımatqa áserin azaıtýǵa jáne turaqty tájirıbelerdi halyqaralyq arenada ilgeriletýge baǵyttalǵan barlyq bastany qoldaıtynyn bildirdi.
Sonymen qatar Erjan Erkinbaev Qazaqstannyń ekologıalyq týrızm salasyndaǵy jetistikterin, sonyń ishinde Saty aýylynyń Best Tourism Villages konkýrsynda úzdik shyqqanyn jáne ITB Berlin halyqaralyq kórmesinde «Gúldengen qaýymdastyqtar» atylymyndaǵy jetistigin atap ótti.