Qazaqstandyq quqyqtanýshy-ǵalym Erkin Ońǵarbaev prezıdent saılaýyndaǵy halyqtyń belsendiligi týraly pikir bildirdi.
Onyń aıtýynsha halyqtyń belsendiligi ósken. Kúni keshe ótken saılaýǵa qatysty quqyqtanýshy óz oıyn bildirdi, dep habarlaıdy Almaty-akshamy.kz QazAqparatqa silteme jasap.
«Meniń oıymsha, Qazaqstanda saılaý quqyǵy deńgeıi aıtarlyqtaı ósti. Halyqtyń belsendiligi joǵary, ásirese referendým kezinde buǵan kýá bolǵan edik. Bul joly da qoǵamnyń saılaýdy ádil ótkizýge degen suranysy joǵary boldy. Bul túpki nátıjege áser etedi. Búginde kóptegen másele sheshimin taýyp jatyr. Qańtar oqıǵasynan keıin Konstıtýsıaǵa birqatar ózgeris engizildi. Biz qazir adam quqyǵyn qorǵaý fýnksıasynyń artyp kele jatqanyn, Konstıtýsıalyq sottyń qurylǵanyn, quqyqtyq qorǵaýdyń joǵary deńgeıin, adam quqyqtary jónindegi Konstıtýsıalyq zańnyń ústemdigin kórip otyrmyz. Munyń bári bizde azamattyń quqyqtary men bostandyqtarynyń óte joǵary qorǵalýyna yqpal etedi», - dedi Erkin Ońǵarbaev Jibek Joly telearnasyndaǵy saılaý taqyrybyna arnalǵan tok-shoýda.
Onyń aıtýynsha, jer qoınaýy baılyǵynyń halyqqa tıesili bolýy - mańyzdy reforma.
«Biz joǵaryda atalǵan máseleni birneshe ret talqylap, onyń iske asatynyn aıttyq. Elimizdiń bolashaǵy - óskeleń urpaq tabysqa ıe bolmaq. Bul da - aýqymdy sharýa. Halyqtyń ál-aýqaty kóptegen elderdegideı, sonyń ishinde arab elderindegideı ósetinine kúmánim joq. Kiris kóbeıip, azamattarymyz jer qoınaýyndaǵy paıdaly qazbalardan tabys tabady. Alaıda, negizgi suranys - áleýmettik ádilettilik pen olıgarhıamen kúreske qatysty. Eger ádilet saltanat quryp, sheteldegi qarjy qaıtarylsa, meniń oıymsha, qoǵam ony qýana qabyldaıdy. Eger qoǵamnyń úmiti aqtalsa, bolashaqta saılaýshylardyń tulǵalardy qoldaýy artady dep oılaımyn», - deıdi ol.